اسرائیلی حملے بڑھ گئے ہیں،فریقین قابو سے باہر ہو سکتے ہیں:ایران

تہران: ایرانی وزیر خارجہ حسین امیر عبداللہیان نے کہا کہ غزہ پر اسرائیل کے حملے خطرناک حد تک پہنچ چکے ہیں اور اس بات کا امکان ہے کہ کسی بھی وقت تمام فریقین کا کنٹرول ختم ہو سکتا ہے۔

ایرانی سٹوڈنٹس نیوز ایجنسی کے مطابق، عبداللہیان نے پریس کے سامنے یہ بیان اس وقت دیا جب وہ اقوام متحدہ میں فلسطین سے متعلق غیر معمولی اجلاس میں شرکت کے لیے نیویارک جا رہے تھے۔

عبداللہیان نے کہا کہ امریکہ اور بعض یورپی ممالک کی صیہونی حکومت کی اندھی حمایت اور غزہ کے عوام کے خلاف قتل عام اور نسل کشی کی وجہ سے مغربی ایشیائی خطے کی صورتحال تمام ممالک کے لیے تشویشناک حد تک بڑھ گئی ہے جس سےتمام ممالک کا کنٹرول ختم ہو سکتا ہے۔

اس بات کا ذکر کرتے ہوئے کہ اسرائیل کے حملے جلد سے جلد بند ہونے چاہئیں اور غزہ تک انسانی امداد پہنچائی جانی چاہیے، ایرانی وزیر نے یاد دلایا کہ فلسطینی گروہوں کو اسرائیل کے خلاف اپنی سرزمین کے دفاع کا حق حاصل ہے اور یہ بین الاقوامی قانون اور اقوام متحدہ کی شرائط کے مطابق ہے۔