مقامی بلدیات کے انتخابات، انچارج وزرا اہم قائدین کے ساتھ مل کرریزرویشن کے مطابق امیدواروں کو حتمی شکل دیں:وزیراعلی تلنگانہ

حیدرآباد: وزیراعلی تلنگانہ ریونت ریڈی نے کہا ہے کہ ریاست میں مقامی بلدیات کے انتخابات کے پیش نظرمختلف اضلاع کے انچارج وزرا اہم قائدین کے ساتھ مل کرریزرویشن کے مطابق امیدواروں کو حتمی شکل دیں۔

انہوں نے کہا کہ ہم انتخابات کے عمل کو آگے بڑھانے کے لئے تمام حالات کا سامنا کرتے ہوئے اقدامات کر رہے ہیں۔ نامزدگیوں کے عمل کے لئے مکمل وقت مختص کیا جائے اور ہر مرحلہ کو مناسب وقت دیا جائے۔

وزیراعلی نے زوم میٹنگ میں کہا کہ پی سی سی کی قانونی ٹیم کو ہدایت دی گئی ہے کہ نامزدگی کی درخواست کے لئے ماڈل فارمیٹ ضلعی سطح پر فراہم کیا جائے۔ساتھ ہی پارٹی ہیڈکوارٹرس گاندھی بھون میں قانونی امور کو حل کرنے کے لئے کوارڈی نیشن کمیٹی قائم کی جائے اور ٹول فری نمبر دستیاب کیا جائے۔

اس بات کو یقینی بنایا جائے کہ کمیٹی میں وہ لوگ شامل ہوں جو انتخابات کے عمل سے واقف ہوں۔انہوں نے نشاندہی کرتے ہوئے کہا کہ ایم پی ٹی سیز اور زیڈ پی چیئر مین کی عہدوں کے انتخاب پر پی سی سی غور کرے گا اور فیصلہ کرے گا۔تب تک اس سلسلہ میں کسی بھی سیاسی اعلان سے گریز کیا جائے۔انہوں نے کہاکہ بی سی ریزرویشن کے سلسلہ میں ہائی کورٹ میں ہونے والی سماعت کی مستقل نگرانی کی جائے۔

اے آئی سی سی انچارج میناکشی نٹراجن، پی سی سی کے صدر مہیش کمار گوڑ، اے آئی سی سی سکریٹری وشوناتھن، وزراء، ڈی سی سی صدور، ایم پیز، ایم ایل ایز، ایم ایل سیز اور امیدواروں نے اس زوم میٹنگ میں حصہ لیا۔