سابق رکن اسمبلی بودھن کے فرزند کیخلاف لک آوٹ نوٹس جاری

حیدرآباد: حیدرآباد پولیس نے ریاست کے سابق ایم ایل اے کے فرزند جو ایک کار حادثہ میں ملوث بتایا گیا ہے کے خلاف لک آوٹ نوٹس جاری کیا ہے۔ جبکہ وہ، مبینہ طور پر دبئی فرار ہوگیا ہے۔ بودھن کے سابق بی آر ایس رکن اسمبلی محمد شکیل عامر کے فرزند راحیل کے خلاف لک آوٹ سرکولر(ایل او سی) جاری کیا گیا ہے۔

 راحیل نے مبینہ طور پر بی ایم ڈبلیو چلاتے ہوئے ڈپٹی چیف منسٹر کی سرکاری رہائش گاہ پرجا بھون کے باہر بریکیڈس کو روند دیا تھا یہ واقعہ 24 دسمبر کو صبح کے وقت پیش آیا۔ حادثہ کے بعد راحیل، دیگر تین دوستوں کے ساتھ فرار ہوگیا بعد میں ایک شخص مقام حادثہ پہونچا اور کار چلانے لگا۔

 اُس نے یہ دعویٰ بھی کیا کہ حادثہ کے وقت بھی وہی ڈرائیونگ کررہا تھا۔ اس شخص کی شناخت اے آصف کی حیثیت سے کی گئی۔ بتایا جاتا ہے کہ وہ سابق ایم ایل اے کا ڈڑائیور ہے۔ آصف نے بتایا کہ حادثہ کے وقت راحیل، گاڑی میں پیچھے بیٹھا ہوا تھا۔ ڈی سی پی نے بتایا کہ حادثہ کے چند گھنٹوں بعد راحیل ممبئی روانہ ہوگیا جہاں سے وہ فلائٹ کے ذریعہ دبئی منتقل ہوگیا۔