موسی پروجکٹ، عوام کے خدشات کودورکرنے چیف منسٹر ریونت ریڈی کی یاترا

حیدرآباد: تلنگانہ کی موسی ندی میں نئی جان ڈالنے کیلئے حکومت کی جانب سے شروع کئے جانے والے باوقارپراجکٹ پر اپوزیشن جماعتوں کی جانب سے عوام میں پیداکئے جانے والے خدشات اورتحفظات کو دور کرنے کیلئے تلنگانہ کے وزیراعلی ریونت ریڈی 8نومبرکو پدیاتراکریں گے۔یہ پدیاترا ن کی سالگرہ کے موقع پر کی جائے گی۔

چیف منسٹر،بھونگیر کے ولی گنڈہ۔ بی بی نگر کے درمیان 6 کیلو میٹر تک بہنے والی موسیٰ ندی کی آلودگی کی صورتحال کی تفصیلات سے عوام کو واقف کروائیں گے۔ حکومت پہلے مرحلہ میں 21کیلو میٹر تک موسیٰ ندی کو ترقی دینے کا منصوبہ رکھتی ہے۔

 اننت گری سے موسیٰ ندی کا آغاز ہوتا ہے۔ حیدرآباد میں موسیٰ ندی میں سیوریج کا پانی اور فیکٹریوں کی آلودگی پائی جاتی ہے۔وزیراعلی اپنے ارکان خاندان کے ساتھ یادگیر گٹہ کی لکشمی نرسمہا سوامی مندر میں خصوصی پوجا کریں گے۔

 وہ چاہتے ہیں کہ موسیٰ ندی کو بحال کرنے کے پراجکٹ کے سلسلہ میں ریاست کی اصل اپوزیشن بی آر ایس کے علاوہ بی جے پی کی تنقیدوں کا جواب دیا جاسکے اور عوام کو حقیقی صورتحال سے واقف کروایا جائے گا۔