یوم جموریہ کے موقع پر نئی اسکیمات کا آغاز، چیف منسٹر ریونت ریڈی کا کابینی رفقا سے تبادلہ خیال

حیدرآباد: تلنگانہ کے وزیر اعلیٰ ریونت ریڈی نے آج حیدرآباد میں کمانڈ کنٹرول سنٹر میں اپنے کابینی رفقا کے ساتھ جائزہ اجلاس منعقد کیا۔ انہوں نے ریاست بھر میں کل سے نافذ ہونے والے مختلف اسکیموں جیسے رعیتو بھروسہ، اندراما آتمیہ بھروسہ، اندراما مکانات اور راشن کارڈس پر وزراء کے ساتھ تبادلہ خیال کیا۔وزیر اعلیٰ نے وزراء کو ان اسکیموں کو عوام تک پہنچانے کے لئے اختیار کی جانے والی حکمت عملی کے بارے میں رہنمائی کی۔

سنگاپور اور داوس کے کامیاب دوروں کے ذریعہ ریاست کے لئے سرمایہ کاری کو کامیابی سے راغب کرنے پر وزراء نے اس موقع پر وزیر اعلیٰ کو مبارکباد دی۔

بعد ازاں، نائب وزیر اعلیٰ بھٹی وکرم مارکا نے ویڈیو کانفرنس میں کہا کہ حکومت کے وعدے کے مطابق کل سے چار فلاحی اسکیموں کا آغاز ہوگا اور مارچ تک اس عمل کو مکمل کیا جائے گا۔انہوں نے کہا کہ ہر منڈل میں ایک گاؤں کو اکائی کے طور پر منتخب کرکے اسکیموں کو نافذ کیا جائے گا اور اہل افراد کواہمیت دی جائے گی۔