مندر میں درشن سے واپسی کے دوران سڑک حادثہ، ایک شخص ہلاک اور دیگر پانچ شدید زخمی

حیدرآباد: تلنگانہ کے ضلع جگتیال میں رونما سڑک حادثہ میں ایک شخص ہلاک اوردیگر پانچ شدید زخمی ہو گئے ۔یہ حادثہ
منگل کی صبح ضلع کے کورٹلہ منڈل کے ایلاپور کے مضافات میں پیش آیا۔

مقامی افراد نے بتایا کہ یہ حادثہ اس وقت پیش آیا جب ان افراد کو لے جانے والی کارچلانے والے نے اس کا توازن کھودیا اور یہ کار ایک بجلی سب اسٹیشن کے قریب سڑک کنارے درخت سے ٹکرا گئی۔

حادثہ اتنا شدید تھا کہ گاڑی کا ڈرائیورجس کی شناخت گڈی پلی نریش (36) ، کے طورپر کی گیی ہے، موقع پر ہی ہلاک ہوگیا۔ زخمیوں میں ایک جوڑا، بی سرینواس اوراس کی بیوی سجاتا کے علاوہ دیگر رشتہ دار شامل ہیں۔

تمام متاثرین کورٹلہ منڈل کے ایلاپور گاؤں کے رہنے والے تھے اورمندرمیں درشن کرنے کے بعد اپنے گاؤں واپس آ رہے تھے کہ یہ حادثہ پیش آیا۔ مقامی افراد نے زخمیوں کو فوری طور پر جگتیال سرکاری اسپتال منتقل کیا۔

اطلاع ملتے ہی پولیس وہاں پہنچی جس نے صورتحال کا جایزہ لیااوراس سلسلہ میں ایک معاملہ درج کرکے جانچ شروع کردی۔پولیس اس حادثہ کی وجوہات معلوم کرنے کی کوشش کررہی ہے۔