پیرس اولمپکس: ریلوے ٹریک پر حملے کے بعد ایئرپورٹ پر بم کی اطلاع سے ہلچل مچ گئی

پیرس: فرانس میں ریلوے ٹریک پر حملے کے بعد ایئرپورٹ پر بم کی اطلاع نے ہلچل مچا دی۔ تفصیلات کے مطابق اولمپکس شروع ہونے سے پہلے فرانس میں خطرے کے بادل چھا گئے ہیں، ریلوے ٹریک پر حملے کے بعد ایئرپورٹ پر بم کی اطلاع نے ہلچل مچا دی۔

سینٹ لوئس میں فرینکو سوئس ایئرپورٹ کو بم کی اطلاع کے بعد خالی کر کے عارضی طور پر بند کر دیا گیا، فرانسیسی پولیس کا کہنا ہے کہ پروازیں بھی منسوخ کر دی گئیں۔

واضح رہے کہ پیرس 2024 اولمپک گیمز پر خطرہ منڈلا رہا ہے، جمعرات کی رات کئی ریلوے عمارات کو آتش زنی کے مربوط حملوں کا نشانہ بنایا گیا، جس کی وجہ سے کئی ٹرین سروسز منسوخ ہوئیں، یا انھیں دوسری طرف موڑا گیا، یا ٹرینوں کی روانگی اور آمد میں تاخیر ہوئی۔

مقامی حکام نے کہا کہ حملوں کا مقصد نقصان پہنچانا تھا، جن کی تحقیقات جاری ہیں، تاہم حکام نے کسی مشتبہ شخص کا نام نہیں لیا، جب کہ عوام کو ہدایت کی گئی ہے کہ وہ سیکیورٹی وجوہ پر غیر ضروری سفر سے گریز کریں۔

حکام کا کہنا تھا کہ ایئرپورٹ کو دو گھنٹے بعد دوبارہ کھول دیا گیا اور کہا کہ فلائٹ آپریشن بتدریج دوبارہ شروع کی جار ہی ہے۔