عوام نے انتخابات میں بی آرایس کو مسترد کردیا:ڈاکٹر کے لکشمن

حیدرآباد: بی جے پی کے رکن راجیہ سبھا کے لکشمن نے کہا ہے کہ دہلی شراب معاملہ کی جانچ تقریبا ایک سال سے جاری ہے۔انہوں نے میڈیا سے کہا کہ کویتا ہی نہیں دہلی کے کئی وزرا بھی اس معاملہ میں جیل کی سزا بھگت رہے ہیں۔ جانچ ایجنسیوں کے کام کو حکومت سے جوڑنے کی عادت اپوزیشن کو ہوگئی ہے۔

غلطی ہوئی یا نہیں وہ بتانے کی ضرورت ہے۔ایجنسیوں کا حکومت سے کوئی تعلق نہیں ہے۔یہ خود مختار اوردستوری ادارے ہیں۔اس میں مداخلت کرنے کا کوئی بھی حق نہیں رکھتا۔انہوں نے کہاکہ اگر غلطی نہیں ہوئی تو سزا نہیں ہوگی اور اگرغلطی کی گئی تو ضرور سزا ہوگی۔

انہوں نے کہاکہ کویتا کے معاملہ میں قانون اپنا کام کرے گا۔انہوں نے کہاکہ عوام نے پچھلے انتخابات میں بی آرایس کو مسترد کردیا۔رشوت خوری اور خاندانی سیاست سے لوگ تباہ ہوگئے ہیں۔

نہ صرف شراب گھوٹالہ بلکہ تلنگانہ میں بی آرایس کے دورحکومت میں وزرا، ارکان اسمبلی نے حکومت کو لوٹا ہے۔جو بھی پراجکٹ کے نام پر گھوٹالے ہوئے ہیں اس کی جانچ ہورہی ہے۔اس کا پردہ فاش ہوگا۔عوام نے تلنگانہ سے بی آرایس کی صفائی کا کام کیا۔