حیدرآباد میں موسلادھار بارش،زبردست گرج چمک سے عوام بیدار

حیدرآباد: شہر حیدرآباد ہفتہ کی صبح زبردست گرج چمک اور باش کے ساتھ بیدار ہوا۔ آج صبح میں شہر بھر میں موسلادھار بارش ہوئی جس سے شہر میں عام زندگی تھم گئی۔ شدید بارش کا سلسلہ تقریباًایک گھنٹہ سے زائد تک چلتا رہا۔

اس موسلا دھار بارش سے جہاں اعظم ترین درجہ حرارت میں کمی آئی وہیں سڑکوں پر پانی جمع ہونے سے ٹرافک میں خلل پڑا۔ صبح7بجے تک سب سے زیادہ بارش حمایت نگر میں 77.8 ملی میٹر ریکارڈ کی گئی جبکہ سیری لنگم پلی میں 71 ملی میٹر، ملکاجگری میں 64، مشیر آباد میں 63.5، شیخ پیٹ میں 61.8 اور نامپلی میں 61.5 ملی میٹر بارش درج کی گئی۔

سکندرآباد، اپل، آصف نگر، بالانگر، خیریت آباد اور دیگر علاقوں میں بھی شدید بارش سے عام زندگی درہم برہم ہوگئی۔ چار روزقبل شہر میں ہوئی طوفانی بارش سے تقابل کیا جائے تو آج صبح کی شدید بارش کے ساتھ ہوا کی رفتار کم تھی۔ شہر کے راجندر نگر علاقہ میں موسلادھار بارش کا آغاز ہوا جو آہستہ آہستہ چارمینار، ایل بی نگر کے ساتھ پورے شہر کو اپنی لپیٹ میں لے لیا۔