سیاسی جماعتوں کا اجلاس۔بی آرایس کو الیکشن کمیشن کی دعوت

حیدرآباد: الیکشن کمیشن آف انڈیا (ای سی آئی) نے بھارت راشٹرا سمیتی (بی آر ایس) کے وفد کو 5 اگست کو نئی دہلی میں واقع نرواچن سدن میں سیاسی جماعتوں کے اجلاس میں شرکت کی دعوت دی ہے۔ یہ اجلاس سہ پہر 3 بجے منعقد ہوگا۔

پارٹی کے کارگزار صدر اور رکن اسمبلی کے ٹی راما راؤ وفد کی قیادت کریں گے۔ اس وفد میں بی آر ایس پارلیمانی پارٹی کے لیڈر کے آر سریش ریڈی، ڈپٹی لیڈر اور راجیہ سبھا رکن ودیراجو روی چندرا، سابق ارکان پارلیمنٹ بی ونود کمار، بلکا سمن اور سینئر رہنما آر ایس پروین کمار شامل ہیں۔

ای سی آئی کے سکریٹری اشونی کمار موہل نے اس ضمن میں ایک باضابطہ مکتوب جاری کیا، جس کی کاپی چیف الیکٹورل آفیسر تلنگانہ کے ذریعہ بی آر ایس صدر کو بھی روانہ کی گئی۔

اجلاس میں انتخابی اصلاحات، مختلف سیاسی جماعتوں کی جانب سے پیش کی گئی زیر التواء نمائندگیاں، مثالی ضابطہ اخلاق اور دیگر انتخابی طریقہ کار پر تفصیلی غور و خوض کیے جانے کا امکان ہے۔