صدرجمہوریہ، امیت شاہ، کھڑگے اور دیگر قائدین کا اظہار تعزیت

احمد آباد: صدر جمہوریہ ہنددروپدی مرمو اور مرکزی وزیر داخلہ امت شاہ سمیت کئی لیڈروں نے وزیر اعظم کی والدہ ہیرا با کے انتقال پر رنج وغم کا اظہار کیا۔ مرمو نے ٹویٹر پر لکھا، ’’وزیراعظم نریندر مودی کی والدہ ہیرابا کی 100 سالہ جدوجہد کی زندگی ہندوستانی نظریات کی علامت ہے۔

 مودی نے اپنی زندگی میں ‘ ماتردیووبھ’ کے جذبے اور ہیرابا کی اقدار کو اپنایا۔ میں ان کی والدہ کی آتما کی شانتی کے لیے دعا گو ہوں۔ خاندان سے میری تعزیت!”

وزیر اعظم مودی کی والدہ کو خراجِ عقیدت پیش کرتے ہوئے مرکزی وزیر داخلہ امت شاہ نے کہا کہ ہیرا با کوکنبےکی پرورش کے لیے جس جدوجہد کا سامنا کرنا پڑا وہ سب کے لیے باعث تحریک ہے۔ شاہ نے کہا کہ پوری قوم دُکھ کی اِس گھڑی میں وزیر اعظم مودی اور اُن کے کنبے کے ساتھ برابر شریک ہے۔

ایک جذباتی ٹوئیٹ میں وزیر اعظم نے کہا کہ اُن کا ایک طویل عمر گزارنے کے بعد انتقال ہوا ہے۔ اپنی والدہ کو خراجِ عقیدت پیش کرتے ہوئے مودی نے کہا کہ وہ اپنی والدہ میں بھگوان کا روپ دیکھتے ہیں، جو بے لوث کرم یوگی اور اقدار کے تئیں زندگی وقف کرنے والی ایک علامت تھیں۔

اپنی والدہ کے 100ویں یومِ پیدائش کے موقعے پر اُن کے ساتھ ملاقات کو یاد کرتے ہوئے وزیر اعظم نے کہا کہ انھوں نے ذہانت کے ساتھ کام کرنے کےلئے اُن کی حوصلہ افزائی کی اور سچائی کے ساتھ زندگی گزارنے کی تلقین کی۔

وزیر دفاع راج ناتھ سنگھ نے ایک ٹویٹ پیغام میں کہا، ’’وزیراعظم نریندر مودی کی والدہ ہیرا با کے انتقال سے مجھے بہت تکلیف ہوئی ہے۔ ماں کی موت سے انسان کی زندگی میں ایسا خالی پن آجاتا ہے جس کی بھرپائی ناممکن ہے۔ میں غم کی اس گھڑی میں وزیر اعظم اور ان کے پورے خاندان کے ساتھ تعزیت کا اظہار کرتا ہوں۔ اوم شانتی”

مدھیہ پردیش کے وزیر اعلیٰ شیوراج سنگھ چوہان نے کہا کہ وزیر اعظم مودی کی والدہ ہمیشہ ایک تحریک بنی رہیں گی۔ اترپردیش کے وزیر اعلیٰ یوگی آدتیہ ناتھ نے اُن کی والدہ کے انتقال پر افسوس کا اظہار کیا ہے اور اُن کےلئے شانتی کی دعا کی ہے۔

پنجاب کے وزیر اعلیٰ بھگونت مان نے کہا ہے کہ اُن کی والدہ کے انتقال سے جو خلا پیدا ہوا ہے اُسے پُر نہیں کیا جاسکتا۔ انھوں نے سوگوار کنبے کے تئیں اپنے تعزیت کا اظہار کیا۔

سابق نائب صدر ایم وینکیا نائیڈو نے کہا کہ ماں اور بچے کے درمیان رشتے کے طور پر بھگوان کی تخلیق کا کوئی مول نہیں ہے اور جسے بیان نہیں کیا جاسکتا۔ انھوں نے اُن کیلئے شانتی کی دعا کی۔

آندھرا پردیش کے سابق وزیر اعلیٰ چندر بابو نائیڈو نے کہا کہ اُن کی دعائیں غم کی اِس گھڑی میں سوگوار کنبے کے ساتھ ہیں۔

شرومنی اکالی دل کے رہنما سکھبیر سنگھ بادل نے وزیر اعظم کی والدہ ہیرا بین کے انتقال پر گہرے رنج و غم کا اظہار کیا ہے اور کہا ہے کہ والدہ کا جانا ایک ناقابل تلافی نقصان ہے۔میرا دل اور دعائیں دکھ کی اس گھڑی میں مودی جی اور ان کے اہل خانہ کے ساتھ ہیں۔

مرکزی وزیر گری راج سنگھ نے اپنے تعزیتی پیغام میں کہا ہے،ماں ہیرا بین مودی نے ملک کو ایک سچا بیٹا دیا، پورا ملک ان کے جانے سے غمزدہ ہے۔

راجیہ سبھا میں اپوزیشن کے لیڈر ملک ارجن کھڑکے نے کہا ہے کہ اُنہیں ہیرا بین مودی کے انتقال کی خبر سن کر گہرا صدمہ پہنچا ہے۔ انھوں نے کہا کہ اُن کی تمام تر ہمدردیاں اور دعائیں سوگوار کنبے کے ساتھ ہیں۔

لوک سبھا کے اسپیکر اوم برلا نے وزیر اعظم کی والدہ ہیرا با کے انتقال پر تعزیت کا اظہار کیا ہے۔ مسٹر برلا نے کہا کہ وہ ایک ایسی والدہ ہیں، جنہوں نے اقدار کے ساتھ کسی شخص کی زندگی کی پرورش کی۔

بی جے پی کے صدر جے پی نڈّا، راجستھان کی سابق وزیر اعلیٰ وسندھرا راجے، سمبت پاترا اور کے اَنّا ملائی سمیت بی جے پی کے کئی لیڈروں نے سوگوار کنبے کے تئیں تعزیت کا اظہار کیا ہے۔