ریلوے پولیس جدید ٹکنالوجی متعارف کرواتے ہوئے ملک کی ترقی میں اپنا حصہ ادا کرے گی:راؤ صاحب پاٹل دانوے

حیدرآباد: مرکزی مملکتی وزیر ریلوے راؤ صاحب پاٹل دانوے نے کہا ہے کہ ریلوے پولیس جدید ٹکنالوجی کو متعارف کرواتے ہوئے ملک کی ترقی میں اپنا حصہ ادا کرے گی۔

ریلوے پروٹکشن فورس(آر پی ایف) کے یوم تاسیس کے موقع پر، انہوں نے ریلوے پولیس فورس کی پریڈ کا دورہ کیا اور آر پی ایف ٹریننگ سنٹر، حیدرآباد میں منعقد ہ پریڈ کی سلامی لی۔

اس موقع پر خطاب کرتے ہوئے انہوں نے کہا کہ آر پی ایف میں 9 فیصد خواتین ہیں جو کہ مسلح افواج میں سب سے زیادہ ہیں۔قبل ازیں آر پی ایف کے ڈائریکٹر جنرل منوج یادو نے ریلوے پولیس فورس میں تاریخی تبدیلیوں کی تفصیلات پیش کیں۔

انہوں نے کہاکہ پچھلے ایک سال کے دوران 3 لاکھ سے زیادہ مسافروں کی حفاظت سے متعلق مسائل کو حل کیا گیا ہے۔ انہوں نے کہا کہ ریلوے پولیس حفاظتی مقاصد کے لیے دستیاب جدید آلات کو استعمال کرنے میں پیشرفت کر رہی ہے۔

انہوں نے کہا کہ 400 سے زیادہ اسٹیشنوں پر سی سی ٹی وی کیمرے نصب کیے گئے ہیں اور ساؤتھ سنٹرل ریلوے کے 7 اسٹیشنوں پر چہرے کی شناخت کی سہولیات ہیں۔

پریڈ میں 8پلاٹون نے حصہ لیا جن میں خواتین پلاٹون، ریٹائرڈ عہدیدارو،ڈاگ سکواڈ، کمانڈ فورس اور جدید تکنیکی آلات سے لیس فورس شامل تھی۔پہلی مرتبہ دہلی کے باہر یہ پریڈ منعقد کی گئی۔