تلنگانہ میں بارش سے 1250 کروڑ کا نقصان، 960 کلو میٹر سڑکیں متاثر

حیدرآباد: حالیہ دنوں میں ہوئی شدید بارش نے تلنگانہ میں محکمہ عمارات وشوارع کو بھاری نقصان پہنچایا ہے۔ محکمہ کے عہدیداروں کے مطابق ریاست بھر میں تقریباً 960 کلو میٹر طویل سڑکیں متاثر ہوئی ہیں اور مجموعی نقصان کا تخمینہ 1250 کروڑ روپے لگایا گیا ہے۔

عہدیداروں نے بتایا کہ متاثرہ علاقوں کی نشاندہی کرلی گئی ہے اور ان کی عارضی و مستقل مرمت کے لیے رپورٹس تیار کی گئی ہیں۔ بارش مکمل طور پر تھمنے کے بعد مستقل مرمتی کام شروع کیے جائیں گے۔

گزشتہ دس دنوں کے دوران ہوئی مسلسل بارش اور طغیانی سے ریاستی و قومی شاہراہیں بری طرح نقصان کا شکار ہوئیں۔ کئی مقامات پر کلورٹ تباہ ہوگئے، پلوں کے قریب سڑکیں کٹ کر خطرناک صورت اختیار کرگئیں۔ اندازوں کے مطابق ریاست بھر میں 788 مقامات پر سڑکوں، پلوں اور کلورٹ کو نقصان پہنچا ہے۔

محکمہ عمارات وشوارع کے انجینئروں نے مرمتی منصوبہ تیار کرتے ہوئے اس بات کا بھی جائزہ لیا ہے کہ کتنی سڑکیں متاثر ہوئیں، کتنے کلورٹ منہدم ہوئے اور کن مقامات پر سیمنٹ کے کام بہہ گئے۔ اسی کے مطابق بحالی کے اقدامات کیے جائیں گے۔