تلنگانہ کی مختلف شعبوں میں تیزرفتار ترقی۔فلوریڈا میں وزیرزراعت کا خطاب

حیدرآباد: تلنگانہ کے وزیر زراعت نرنجن ریڈی نے کہا ہے کہ تلنگانہ 9 سالوں میں تبدیل ہوگیا ہے اور حیدرآباد کا نام بین الاقوامی سطح پر دن بدن مقبول ہو رہا ہے۔

انہوں نے امریکہ کے فلوریڈا میں تارکین وطن کے اجلاس سے خطاب کرتے ہوئے واضح کیا کہ دنیا کی مشہور صنعتی کمپنیاں سرمایہ کاری کے ساتھ تلنگانہ کا رخ کررہی ہیں۔

انہوں نے کہاکہ تلنگانہ حکومت عوام کو 24 گھنٹے بجلی اور محفوظ پینے کے پانی کے ساتھ بنیادی سہولیات فراہم کرنے میں ایک قدم آگے ہے۔

رعیتوبندھو، رعیتوبیمہ، زرعی مقاصد کے لیے 24 گھنٹے بجلی، مناسب بیج اور کھاد کے ساتھ، تلنگانہ میں کاشتکاری کی سرگرمیاں انجام دی جارہی ہیں۔

انہوں نے کہاکہ تلنگانہ تعلیم، طب، زراعت اور روزگار پیدا کرنے کے شعبوں میں تیزی سے آگے بڑھ رہا ہے،اس کا ثبوت مرکزی حکومت کی طرف سے مختلف شعبوں میں دیئے جانے والے ایوارڈس سے ملتا ہے۔

انہوں نے ترقی کے سلسلہ میں تلنگانہ سے تعلق رکھنے والے امریکہ میں مقیم این آرآئیز سے تعاون کی خواہش کی۔