تلنگانہ ایس ایل بی سی سرنگ میں بچاو آپریشن روک دیاگیا

حیدرآباد: تلنگانہ کے ایس ایل بی سی سرنگ حادثہ میں پھنس جانے والے افراد کو باہر نکالنے کے لئے دو ماہ سے جاری بچاو آپریشن ہفتہ کو روک دیا گیا۔

اس دل دہلانے والے حادثہ میں 8 مزدور لاپتہ ہوگئے تھے، جن میں سے دو مزدوروں کی لاشیں نکالی جا چکی ہیں، جب کہ بقیہ 6 مزدوروں کے لئے تلاشی و کھدائی کا کام جاری تھا۔

تقریباً 63 دنوں تک مسلسل جاری رہنے والے ریسکیو آپریشن کو آج عارضی طور پر روک دیا گیا ہے، جس کے بعد سرنگ کے اندر دن رات کام کرنے والے ایکسکاویٹرس کو باہر نکالا گیا ہے۔

حکام کے مطابق سرنگ کے زیادہ تر حصہ سے ملبہ ہٹا دیا گیا ہے، صرف خطرناک زون میں کچھ ملبہ باقی ہے، جہاں مزید کام کرنا باقی ہے۔ واضح رہے کہ یہ حادثہ 22 فروری کو سری سیلم کے لفٹ بینک کنال کے سرنگ میں پیش آیا تھا، جہاں پانی کی نکاسی کے لئے کام جاری تھا۔

اس منصوبہ کو ریاستی حکومت نے ایک اہم اور باوقار مشن کے طور پر لیا تھا، جس میں مسلسل کئی ہفتوں تک امدادی کارروائیاں جاری رہیں۔

تاہم اب ٹیکنیکل کمیٹی نے رپورٹ دی ہے کہ سرنگ کے انلیٹ سے 13.6 کلومیٹر اندر جانا بالکل محفوظ نہیں ہے، لہٰذا مزید خطرہ سے بچنے کے لئے عارضی طور پر آپریشن روکنے کی سفارش کی گئی ہے۔