ریونت ریڈی نے کانگریس کی حمایت کیلئے لوگوں کا شکریہ ادا کیا

حیدرآباد: تلنگانہ کے وزیراعلیٰ ریونت ریڈی نے ریاست کے لوگوں کی حمایت کے لئے شکریہ ادا کیا اور کہا کہ عوام نے کانگریس کے 100 دن کے اقتدار کو پسند کیا ہے۔

ریڈی نے چہارشنبہ کو اپنی رہائش گاہ پر میڈیا سے بات کرتے ہوئے کہا کہ اسمبلی انتخابات کے مقابلے میں پارلیمانی انتخابات میں کانگریس کے ووٹ فیصد میں اضافہ ہوا ہے، جس سے اس کے ایجنڈے کو عوامی حمایت کا اشارہ ملتا ہے۔

انہوں نے کہا کہ عوام نے کانگریس کی 100 دن کی حکومت کی حمایت کی ہے۔ انہوں نے بھارت راشٹرا سمیتی (بی آر ایس) کے رہنماؤں پر بھارتیہ جنتا پارٹی (بی جے پی) کے فائدے کے لیے اپنی ہی پارٹی کو کمزور کرنے کا الزام لگایا۔

وزیراعلیٰ نے کہا کہ بی آر ایس نے اس الیکشن میں اپنی روح کی قربانی دی ہے۔ انہوں نے الزام لگایا کہ سدی پیٹ میں ہریش راؤ کے مضبوط اثر و رسوخ کے باوجود بی آر ایس کے ووٹ بی جے پی کو گئے۔ انہوں نے دعویٰ کیا کہ بی آر ایس کی سازش کی وجہ سے کانگریس کو آٹھ سیٹوں کا نقصان ہوا۔

ریونت ریڈی نے زور دے کر کہا کہ وزیر اعظم نریندر مودی کا اثر کم ہوگیا ہے، جس سے ظاہر ہوتا ہے کہ قومی جمہوری اتحاد (این ڈی اے) کے لیے عوامی حمایت میں کمی آئی ہے۔

انہوں نے ذاتی ذمہ داری لینے کا وعدہ کیا نیز پہلے سے کہیں زیادہ محنت کرنے کا عہد بھی کیا۔ انہوں نے آندھرا پردیش حکومت کے ساتھ یکجہتی میں کھڑے ہونے اور جائیداد اور پانی کی تقسیم کے مسائل کو بات چیت کے ذریعے حل کرنے کے اپنے عزم پر زور دیا۔