تلنگانہ کے آصف آباد ڈپو کی آر ٹی سی بس ندی میں گرگئی۔کئی مسافرین زخمی
تلنگانہ کے آصف آباد ڈپو سے تعلق رکھنے والی آر ٹی سی بس ایک خطرناک حادثہ کا شکار ہو گئی ۔ یہ حادثہ اس وقت پیش آیا جب بس عادل آباد سے آصف آباد کی طرف جا رہی تھی۔ ضلع کے اوٹنور منڈل میں شیام پور کے قریب بس اچانک قابو سے باہر ہو گئی اور پل سے نیچے ندی میں جا گری۔
حیدرآباد: تلنگانہ کے آصف آباد ڈپو سے تعلق رکھنے والی آر ٹی سی بس ایک خطرناک حادثہ کا شکار ہو گئی ۔ یہ حادثہ اس وقت پیش آیا جب بس عادل آباد سے آصف آباد کی طرف جا رہی تھی۔ ضلع کے اوٹنور منڈل میں شیام پور کے قریب بس اچانک قابو سے باہر ہو گئی اور پل سے نیچے ندی میں جا گری۔
حادثہ کے وقت بس میں موجود مسافرین شدید زخمی ہوگئے۔اس حادثہ کی اطلاع ملتے ہی مقامی افرادفوری طور پر وہاں پہنچ گئے اور زخمیوں کو بچانے کی کوششیں شروع کر دیں۔ مقامی افرادنے فوری طور پر 108 ایمبولینس کو مطلع کیا اور زخمیوں کو اوٹنور کے سرکاری اسپتال منتقل کیا۔
اطلاع ملتے ہی پولیس کی ٹیم بھی موقع پر پہنچ گئی اور صورتحال کا جائزہ لیا۔ اس حادثہ کے سلسلہ میں آصف آباد کے ڈپو مینیجر راج شیکھر نے بتایا کہ حادثہ کی وجوہات جاننے کے لئے تحقیقات شروع کر دی گئی ہیں۔
انہوں نے کہا کہ اس بات کا پتہ لگایا جا رہا ہے کہ آیا یہ حادثہ کسی تکنیکی خرابی کی وجہ سے پیش آیا یا پھر ڈرائیور کی لاپرواہی اس کا سبب بنی۔ حکام فی الحال زخمیوں کی تفصیلات اور ان کی شناخت کے عمل میں مصروف ہیں۔
