صحت مند رہنے کیلئے دوڑ مفید: ہریش راؤ

حیدرآباد:تلنگانہ کے وزیر صحت ہریش راو نے کہا ہے کہ سدی پیٹ ضلع کھیلوں میں ریاستی اور قومی سطح کے مقابلوں کا ایک پلیٹ فارم بن گیا ہے۔ ہم اس طرح کے پروگراموں کے جذبے کے ساتھ آگے بڑھ رہے ہیں تاکہ تمام شعبوں میں ترقی یافتہ شہر کو کھیلوں کا مرکز بنایا جا سکے۔

 وزیر ہریش راؤ نے سدی پیٹ کے گورنمنٹ ڈگری کالج گراؤنڈ میں ہاف میراتھن کو جھنڈی دکھا کر روانہ کیا۔ اس موقع پر انہوں نے کہا کہ ٹاؤن میں انٹرنیشنل کرکٹ اسٹیڈیم اور سوئمنگ پول بنایا گیا ہے۔

 انہوں نے کہا کہ ریاستی سطح پر تیراکی کے مقابلوں، والی بال اور فٹ بال کے مقابلوں کا انعقاد کیا گیا۔ وزیر موصوف نے کہا کہ رنگانائیک ساگر میں ریاستی سطح کے سائیکلنگ مقابلے منعقد ہوئے اور آج سدی پیٹ سے ایک اور نیا پروگرام شروع کیا گیا۔

انہوں نے انکشاف کیا کہ ان کی خواہش ہے کہ سدی پیٹ کو ہر میدان میں ایک مثالی بنایا جائے۔ انہوں نے کہا کہ یہ صرف شروعات ہے اور اس طرح کے پروگرام مسلسل جاری رہیں گے۔

دوڑ ہمارے روزمرہ کے معمولات کا حصہ ہونا چاہیے۔ انہوں نے کہا کہ صحت ایک نعمت ہے اور یہ دوڑ صحت مند رہنے کے لیے مفید ہے۔ انہوں نے کہا کہ ہر سال ہاف میراتھن دوڑ کا انعقاد کیا جائے گا۔