تلنگانہ کے ناگرکرنول ضلع میں آٹو اور کار کے تصادم سے کئی طلبہ اور مزدور شدید زخمی

حیدرآباد: تلنگانہ کے ناگرکرنول ضلع میں آٹو اور کار کے تصادم سے کئی طلبہ اور مزدور شدیدزخمی ہوگئے۔یہ حادثہ جمعرات کی صبح ضلع کے تلکاپلی منڈل میں اُس وقت پیش آیا جب آٹو اورکار متصادم ہوگئے۔

عینی شاہدین نے بتایا کہ گولا گنڈم گاؤں کے مضافاتی علاقہ میں آٹو تلکاپلی کی جانب جا رہا تھا جس میں زرعی مزدوروں کے ساتھ طلبہ بھی سوار تھے کہ سامنے سے آنے والی کار سے یہ آٹو ٹکرا گیا۔

تصادم کے بعد آٹو کھیت میں الٹ گیا۔اس حادثہ میں تقریباً دس سے زائد طلبہ اور مزدور شدید زخمی ہوئے۔ مقامی پولیس نے موقع پر پہنچ کر زخمیوں کو اسپتال منتقل کیا۔

اس حادثہ کی اطلاع پر رکن اسمبلی راجیش ریڈی نے فون کے ذریعہ ڈاکٹروں کو ہدایت دی کہ زخمیوں کو فوری اور مناسب طبی امداد فراہم کی جائے۔