دونوں تلگو ریاستوں میں شدید سردی کی لہر

حیدرآباد: دونوں تلگو ریاستوں تلنگانہ اور آندھرا پردیش میں ان دنوں سردی کی شدت میں غیر معمولی اضافہ ہو گیا ہے جس کی وجہ سے معمولاتِ زندگی بری طرح متاثر ہوئے ہیں۔ محکمہ موسمیات نے کئی اضلاع کے لئے اورنج الرٹ جاری کر دیا ہے۔

بیشتر علاقوں میں رات کا درجہ حرارت تیزی سے گر رہا ہے۔ شمالی تلنگانہ کے اضلاع جیسے آصف آباد، عادل آباد، سنگاریڈی اور نرمل میں اقل ترین درجہ حرارت 6 سے 10 ڈگری سیلسیس تک پہنچ گیا ہے۔

پڑوسی ریاست آندھرا پردیش میں بھی سردی کی لہر برقرار ہے۔ الوری سیتا رام راجو ضلع کے منیم ایجنسی کے علاقوں میں درجہ حرارت 7 ڈگری سیلسیس کے قریب ریکارڈ کیا جا رہا ہے۔

تلنگانہ کے دارالحکومت حیدرآباد میں بھی سردی کی شدت میں اضافہ ہوا ہے جہاں مضافاتی علاقوں میں درجہ حرارت 8 ڈگری سیلسیس سے بھی کم ریکارڈ کیا گیا۔

صبح کے اوقات میں کہر چھائے رہنے کی وجہ سے سڑکوں پر آمد و رفت متاثر ہو رہی ہے اور گاڑی چلانے والوں کو شدید مشکلات کا سامنا ہے۔ کئی مقامات پر دن دس بجے تک بھی کہر برقرار رہتی ہے۔

شدید سردی کی وجہ سے بچوں، بزرگوں اور بے گھر افراد کی مشکلات بڑھ گئی ہیں۔ نزلہ، زکام، کھانسی اور سانس لینے میں دشواری کے معاملات میں اضافہ درج کیا گیا ہے۔

محکمہ موسمیات نے انتباہ دیا ہے کہ آئندہ چند دنوں تک سردی کی یہ لہر برقرار رہے گی اور درجہ حرارت میں مزید 3 سے 4 ڈگری سیلسیس تک کمی آ سکتی ہے۔ شہریوں کو احتیاطی تدابیر اختیار کرنے کی ہدایت دی گئی ہے۔

انتظامیہ نے عوام سے اپیل کی ہے کہ وہ غیر ضروری طور پر گھروں سے نکلنے سے گریز کریں اور خود کو گرم رکھنے کے لئے مناسب انتظامات کریں۔