کشی نگر میں آگ لگنے سے ایک ہی خاندان کے چھ افراد جاں بحق

کشی نگر: اترپردیش میں گزشتہ شب کشی نگر ضلع کے رام کولا نگر پنچایت علاقے کے ایک گھر میں آگ لگنے سے ایک ہی خاندان کے چھ افراد کی موت ہوگئی۔

سرکاری ذرائع نے جمعرات کو بتایا کہ رات تقریباً 12:30 بجے نگر پنچایت رامکولہ کے وارڈ نمبر دو باپو نگر (گاؤں اُرداہا) تحصیل کپتان گنج میں نامعلوم وجوہات کی بناء پر لگنے والی آگ میں نومی کی بیوی سنگیتا، بیٹا انکت (10)، بیٹی لکشمینا (9)، ریتا (3)، گیتا (2) اور بابو (1) کی آگ میں جھلس کر موت ہوگئی۔

ضلع مجسٹریٹ رمیش رنجن نے بتایا کہ آگ لگنے کی وجوہات کی تحقیقات کی جا رہی ہے۔

آگ کی اطلاع ملتے ہی موقع پر پہنچی فائر بریگیڈ کے اہلکاروں نے آگ پر قابو پالیا تھا۔

محکمہ ریونیو کی ٹیم موقع پر موجود ہے۔متوفی کے زیر کفالت افراد کو امداد فراہم کی جائے گی۔