صوفیہ قریشی نے بغیر کوچنگ کے UPSCمیں نمایاں کامیابی حاصل کی

مدھیہ پردیش کے شہر ساگر کی باصلاحیت طالبہ صوفیہ قریشی نے یونین پبلک سروس کمیشن (UPSC) 2025 کے نتائج میں 253ویں رینک حاصل کرکے نہ صرف اپنے خاندان بلکہ پورے شہر کا نام روشن کردیا۔ خاص بات یہ ہے کہ صوفیہ نے یہ کامیابی کسی کوچنگ انسٹی ٹیوٹ کی مدد کے بغیر صرف خود مطالعہ اور سخت محنت کے ذریعہ حاصل کی۔

صوفیہ قریشی چار بہن بھائیوں میں سب سے چھوٹی ہیں۔ ان کے والد ایک ریٹائرڈ پرنسپل ہیں، جنہوں نے ہمیشہ اپنے بچوں کو تعلیم اور نظم و ضبط کی اہمیت سکھائی۔ محدود وسائل کے باوجود صوفیہ نے اپنے مقصد کو حاصل کرنے کے لئے مسلسل محنت کی اور آخرکار ملک کے سب سے مشکل امتحانات میں شمار ہونے والے UPSC میں کامیابی حاصل کرلی۔

وہ روزانہ 8 سے 10 گھنٹے باقاعدگی سے مطالعہ کرتی تھیں۔ انہوں نے اپنی تیاری مکمل طور پر گھر سے ہی کی اور کسی کوچنگ کا سہارا نہیں لیا۔

دلچسپ بات یہ بھی ہے کہ صوفیہ نے تیاری کے دوران سوشل میڈیا سے مکمل دوری اختیار کی۔ یہاں تک کہ انہوں نے آج تک کسی بھی سوشل میڈیا پلیٹ فارم پر اپنا اکاؤنٹ تک نہیں بنایا۔ ان کا ماننا ہے کہ کامیابی کے لئے توجہ اور وقت کی درست تقسیم بے حد ضروری ہے۔

پڑھائی کے ساتھ ساتھ صوفیہ نے گھریلو ذمہ داریاں بھی بخوبی نبھائیں اور گھر کے کاموں میں اپنے خاندان کی مدد کرتی رہیں۔

صوفیہ قریشی کی یہ کامیابی ان ہزاروں طلبہ کے لئے ایک بڑی مثال اور تحریک ہے جو اکثر کوچنگ یا وسائل کی کمی کو ناکامی کی وجہ سمجھتے ہیں۔