دہلی میں شیومندر کا انہدام روکنے سے سپریم کورٹ کا انکار

نئی دہلی: سپریم کورٹ نے جمعہ کے دن نئی دہلی کی گیتا کالونی میں واقع پراچین شیومندر کا انہدام روکنے سے انکار کردیا۔

جسٹس سنجے کمار اور جسٹس آگسٹین جارج مسیح پر مشتمل بنچ نے دہلی ہائی کورٹ کے 29مئی کے فیصلہ کو برقرار رکھا۔

دہلی ہائی کورٹ کی جسٹس دھرمیش شرما کی بنچ نے پراچین شیومندرعوام اکھاڑہ سمیتی کو مورتیاں اور دیگر مذہبی علامتیں مندر سے ہٹانے کے لئے 15 دن کا وقت دیا تھا۔

اس نے درخواست گزار سوسائٹی اور اس کے ارکان سے کہا تھا کہ وہ مندر ڈھانے کے عمل میں کوئی رکاوٹ پیدا نہ کرے۔

ہائی کورٹ نے کہا تھا کہ اس میں کوئی شبہ نہیں کہ یمنا پشتہ اور سیلاب کی زد میں آنے والے علاقے اگر تمام متجاوزات اور غیرقانونی تعمیرات سے آزاد کرالئے جائیں تو بھگوان شیو خوش ہوں گے۔

درخواست گزار سوسائٹی ٹائٹل کے تعلق سے کوئی بھی کاغذات آن ریکارڈ لانے میں قابل ِ رحم حد تک ناکام رہی۔

آن ریکارڈ کوئی ثبوت نہیں کہ اس مندر کی کوئی تاریخی اہمیت ہے۔ مینجمنٹ سوسائٹی نے اپنی درخواست میں کہا کہ باقاعدہ نوٹس نہیں دی گئی صرف بھکتوں سے زبانی طورپر کہا گیا کہ پراچین مندر کو ڈھادیا جائے گا۔