کورٹلہ میں خاتون سافٹ ویر انجینئر کا مشتبہ قتل

حیدرآباد: سافٹ ویرانجینئر کی مشتبہ حالت میں موت ہوگئی۔ یہ واقعہ تلنگانہ کے ضلع جگتیال کے کورٹلہ ٹاون میں پیش آیا۔

 پولیس کے مطابق بی سرینواس ریڈی اور مادھوی جوڑا ٹاون کے چیمونی دوبہ علاقہ میں رہتے ہیں۔ ان کی تین اولادیں دیپتی، چندنا اور سائی ہیں۔

دیپتی حیدرآباد میں دیڑھ سال سے سافٹ ویئر انجینئر کے طورپر کام کررہی تھی۔ وہ فی الحال گھر سے کام کر رہی تھی۔ چندنا نے بی ٹیک مکمل کر لیا اور گھر پر ہی رہ رہی تھی جبکہ بیٹا سائی بنگلور میں ڈگری کی تعلیم حاصل کر رہا ہے۔

سرینواس ریڈی اور مادھوی گھر میں داخلے کی تقریب میں شرکت کیلئے اتوار کو حیدرآباد گئے تھے۔ دونوں نے پیر کی رات 10 بجے اپنی بیٹیوں سے فون پر بات کی۔

منگل کی دوپہر کو فون کرنے پر دیپتی نے فون نہیں اٹھایا جبکہ چندنا کا فون سوئچ آف تھا۔ اس جوڑے نے پڑوسیوں کو اس بات کی اطلاع دی اور ان سے خواہش کی کہ گھر جا کر وہ معلوم کرے جس پر پڑوسیوں نے ان کو فون پر بتایا کہ دیپتی مر چکی ہے۔

اس بات کی اطلاع پر پولیس نے موقع پر پہنچ کر صورتحال کا جائزہ لیا۔ دیپتی کی لاش صوفے پر پڑی تھی، باورچی خانہ میں شراب کی دو بوتلیں، کولڈ ڈرنک کی ایک بوتل اور کھانے کے پیکٹ ملے۔

پولیس نے دیپتی کی بہن چندنا کا پتہ چلانے کی کوشش کی۔ پولیس کو بس اسٹینڈ کے سی سی ٹی وی کیمروں کی جانچ پر پتہ چلا کہ وہ اور ایک نوجوان صبح 5:12 تا 5:16 بجے کے درمیان نظام آباد جانے والی بس میں سوار ہوئے۔

پولیس نے دیپتی کے باپ کی شکایت پر مشتبہ موت کا مقدمہ درج کرلیا۔

پولیس نے کہا کہ چندنا کا پتہ چلانے کی کوشش کی جارہی ہے۔ پولیس جانچ کررہی ہے کہ شراب کی بوتلیں گھر میں کیسے آئیں؟ پولیس اس بات کی جانچ کر رہی ہے کہ چندنا اس نوجوان کے ساتھ کیوں فرار ہوئی؟