نچلی کمر کا درد: وہ تکلیف جو زندگی کو مفلوج کر دیتی ہے،وجوہات، علامات اور احتیاطی تدابیر/دیکھ بھال

نچلی کمر کا درد (Low Back Ache) ایک عام مگر اذیت ناک بیماری ہے جو معمولاتِ زندگی کو شدید متاثر کرتی ہے۔ کبھی ہلکی سی چبھن، تو کبھی تیز، ناقابل برداشت درد آپ کو بستر سے اٹھنے، بچے کو گود میں لینے یا دفتر میں کرسی پر بیٹھنے جیسے سادہ کاموں سے بھی خائف کر دیتا ہے۔

آپ اکیلے نہیں ہیں۔ کمر درد ڈاکٹر سے رجوع کرنے یا چھٹی لینے کی ایک عام وجہ ہے۔ لیکن اس کی وجوہات کیا ہیں؟ آپ اسے کیسے کنٹرول کر سکتے ہیں؟ اور سب سے اہم بات آپ اسے دوبارہ آنے سے کیسے روک سکتے ہیں؟

نچلی کمر کا درد کیوں ہوتا ہے؟

نچلی کمر کا درد کسی کو بھی ہوسکتا ہے‘ چاہے چاق و چوبند نوجوان ہوں یا ضعیف لوگ ریڑھ کی ہڈی کے گھس جانے کا شکار ہوسکتے ہیں۔ اس کی عام وجوہات میں شامل ہیں:

عام وجوہات

• غلط انداز میں بیٹھنا یا میز پرجھک کر موبائل دیکھنا
• وزنی چیزوں کو غلط طریقے سے اٹھانا یا ورزش میں حد سے زیادہ محنت
• ریڑھ کی ہڈی کی ڈسک کا پھٹنا یا باہر نکل آنا
• عمر رسیدگی کے سبب جوڑوں اور ڈسک کا گھس جانا
• غیر فعال طرزِ زندگی، موٹاپا اور ذہنی دباؤ

پہچاننے والی علامات

نچلی کمر کا درد ابتدا میں ہلکی سختی یا کھنچاؤ کی صورت میں شروع ہوتا ہے جو حرکت کرتے وقت شدید ہو جاتا ہے۔ کچھ افراد میں یہ درد شدید اور عمیق ہوتا ہے جو ٹانگوں تک پھیلتا ہے اور یہ  عرق النساء (sciatica) کی علامت ہو سکتی ہے۔ اگر ٹانگوں میں سن ہونا یا کمزوری محسوس ہو تو ممکنہ طور پر کوئی نس دب رہی ہے۔

اگرچہ زیادہ تر کمر درد آرام اور دیکھ بھال سے بہتر ہو جاتا ہے کچھ علامات ایسی ہوتی ہیں جن پر فوری طبی توجہ کی ضرورت ہوتی ہے:

اگر 4 تا 6 ہفتوں تک گھریلو نگہداشت کے باوجود درد برقرار رہے

ٹانگوں میں سن پن یا کمزوری

پیشاب یا پاخانہ پر قابو نہ رہنا — جو کہ Cauda Equina Syndrome کی علامت ہو سکتی ہے، اور ہنگامی صورتحال ہوتی ہے

علاج اور افاقہ

جب کمر کا درد اچانک شروع ہو، تو ایک یا دو دن آرام کرنا فائدہ مند ہو سکتا ہے، مگربستر پر زیادہ دیر لیٹے رہنا حالات کو بگاڑ سکتا ہے۔

عارضی سکون کے لیے:

• تیز درد کی صورت میں برف اوراکڑن کی صورت میں گرم پانی کا استعمال کریں
• درد شکن  جیسے آئبوپروفین ibuprofen یا پیراسیٹامول paracetamol لیں
• نسوں کے درد کی صورت میں گاباپنٹن abapentin یا پریگابالن pregabalin  جیسی دوائیں تجویز کی جا سکتی ہیں
• شدید یا مسلسل درد کی صورت میں معالج درج ذیل علاج تجویز کر سکتا ہے:
• فزیو تھراپی: ریڑھ کی ہڈی کو مضبوط بنانے اور حرکت بڑھانے والی ورزشیں
• اسٹیرائڈ انجیکشنز: سوجن اور درد کو کم کرنے کے لیے

مداخلتی طریقہ علاج:  جیسے گھٹیا کے لئے ایپیڈورل اسٹیرائڈ epidural steroid انجکشن، اعصابی درد کے لئے فیسٹ جوائنٹ facet joint انجکشنز یا درد والی نسوں کو بند کرنے ریڈیو فریکوئنسی ایبلیشنadiofrequency ablation r(RFA)

آپریشن کب ضروری ہوتا ہے؟

سرجری کو ہمیشہ آخری حل سمجھا جاتا ہے، صرف اسی وقت جب روایتی طریقہ علاج ناکام ہو جائے اور  سنگین علامات ظاہر ہوں جیسے اعصابی نقصان یا مثانے/آنتوں کے کنٹرول کا ختم ہونا۔ عام طریقہ کار میں شامل ہیں:

• لامینکٹومی۔ نسوں کے دباؤ کو کم کرنے ریڑھ کی ہڈی کا منکا نکالنا
• ڈسیکٹومی: پھٹی ہوئی غضروف(ڈسک)کا حصہ نکالنا
• اسپائنل فیوژن: دو یا زائد ہڈیوں (کے منکوں) کو آپس میں جوڑ دینا
• شفا یابی اور مستقبل میں کمر درد سے بچاؤ

آپ کا سفر درد کم ہونے پر ختم نہیں ہوتا۔ بحالی طاقت کو دوبارہ حاصل کرنے اور دردناک حملے کو روکنے کے لیے ضروری ہے۔ ان چیزوں پر توجہ مرکوز کریں:

معتدل ورشیں: بنیادی عضلات کو مضبوط بنانے والی ورزشیں (پلینک، برج وغیرہ)

کور ورزشیں:  جیسے لکڑی کا تختہ یا عرشہ جو آپ کی ریڑھ کی ہڈی کو سہارا دیں۔

درست اندازِ نشست: سیدھابیٹھیں ’ ایرگونومک  ergonomicکرسی کا استعمال کریں اور جھکے رہنے سے پرہیز کریں

ہلکی پھلکی جسمانی سرگرمیاں:   تیراکی یا چہل قدمی آپ کی کمر پر دباؤ ڈالے بغیر آپ کو فٹ رکھتے ہیں

صحت مند طرزِ زندگی:  صحت مند وزن کو برقرار رکھیں‘ ذہنی تناؤ پر قابو پائیں‘ کیلشیم اور وٹامن ڈی سے بھرپور غذائیں کھائیں اور سگریٹ نوشی ترک کردیں (جو ریڑھ کی ہڈی کے انحطاط کو بڑھاتی ہے)

متوازن غذا، کیلشیم اور وٹامن ڈی، وزن پر قابو، ذہنی سکون اور سگریٹ نوشی سے اجتناب

کمر درد کے ساتھ زندگی گزارنا‘نا آسودہ ہو سکتا ہے جو آپ کے کام‘ خاندانی زندگی اور تندرستی کے احساس کو متاثر کرتا ہے۔

 لیکن یاد رکھیں: آپ اکیلے نہیں ہیں اور مدد دستیاب ہے۔ اپنے درد کو سمجھ کر مناسب علاج تلاش کر کے اور اپنی کمر کی طویل مدتی دیکھ بھال کے لیے پرعزم ہو کر آپ ان سرگرمیوں کی طرف واپس جا سکتے ہیں جن سے آپ محبت کرتے ہیں اور طاقت اور اعتماد کے ساتھ زندگی گزار سکتے ہیں۔

ڈاکٹر سید عثمان

سینئر کنسلٹنٹ نیورولوجی، اسٹار ہاسپٹلس، نانک رام گوڑہ