تلنگانہ: جورالا پراجکٹ کے 12 دروازے کھول دیے گئے تلنگانہ کے

حیدرآباد: مہاراشٹرا میں ہو رہی مسلسل موسلا دھار بارش کے نتیجہ میں دریایے کرشنا میں زبردست سیلابی صورتحال پیدا ہو گئی ہے جس سے تلنگانہ کے جورالا پراجکٹ میں پانی کے بہاو میں اضافہ ہوا ہے۔

پراجکٹ میں گنجائش سے زیادہ پانی جمع ہو جانے پر حکام نے احتیاطی اقدام کے طور پر رات کے وقت جورالا پراجکٹ کے 12 دروازے کھول کر پانی کو نچلے علاقوں میں چھوڑنا شروع کر دیا۔

اس وقت جُورالا پراجکٹ میں 1,05,000 کیوسک پانی کی آمد ہو رہی ہے جب کہ 1,03,908 کیوسک پانی کو نچلے علاقوں کی طرف خارج کیا جا رہا ہے۔

ڈیم کی مکمل سطح 318.518 میٹر ہے، جبکہ فی الحال پانی کی سطح 317.380 میٹر پر برقرار ہے۔

جورالا پراجکٹ سے خارج ہونے والے پانی کے باعث سری سیلم پراجکٹ میں بھی پانی کی آمد میں تیزی آئی ہے۔ حکام کے مطابق وہاں پانی کی سطح 850 فٹ تک پہنچ گئی ہے، جبکہ مکمل گنجائش 885 فٹ ہے۔

حکام صورتحال پر گہری نظر رکھے ہوئے ہیں اور نچلے علاقوں کے عوام کو چوکس رہنے کی ہدایت دی گئی ہے۔