تلنگانہ اسمبلی میں آبپاشی پراجکٹس پر وائٹ پیپر جاری، کالیشورم پروجیکٹ میں بے ضابطگیاں

حیدرآباد: تلنگانہ اسمبلی کے بجٹ اجلاس کے موقع پر حکومت نے آبپاشی پراجکٹس پر ایک وائٹ پیپر جاری کیا۔

اس موقع پر وزیر آبپاشی اتم کمار ریڈی نے کہا کہ کالیشورم میں میڈی گڈا ایک اہم بیراج ہے۔ بدقسمتی سے، ناقص معیار کی وجہ سے یہ بیراج گر گیا۔

انہوں نے کہا کہ کرپشن اور لاپرواہی کے باعث اس پراجکٹ کو نقصان پہنچا۔ انہوں نے کہا کہ جو بیراج 100 سال چلنا تھا وہ تین سال میں گر گیا۔

انہوں نے کہا کہ محکمہ آبپاشی میں جتنی کرپشن پچھلے دس سالوں میں ہوئی کہیں اور نہیں ہوئی۔ کئی پراجکٹس کی تخمینہ لاگت بڑھ گئی ہے۔

انہوں نے کہا کہ میڈی گڈا بیراج کی تعمیر کے لیے 1800 کروڑ روپے کے ٹنڈرطلب کیے گئے ہیں۔ تخمینہ لاگت 4500 کروڑ روپے تک بڑھا دی گئی ہے۔ انہوں نے کہا کہ اس طرح کی بدعنوانی آزاد ہندوستان میں کہیں نہیں ہوئی ہے۔ اتم کمار ریڈی نے واضح کیا کہ حکومت کی ترجیح ریاست میں زیر التواء تمام آبپاشی پروجیکٹوں کو کم لاگت اور تیزی سے مکمل کرنا ہے۔

انہوں نے کہا کہ جاری آبپاشی پراجکٹس میں بدعنوانی کی کوئی جگہ کے بغیر، موثر استعمال کے ساتھ سب سے زیادہ لوگوں کو پانی فراہم کرنے کے لیے ضروری فنڈز فراہم کرنے کے لیے حکمت عملی تیار کی جارہی ہے۔ انہوں نے کہا کہ چونکہ پالامورو-رنگاریڈی لفٹ پروجیکٹ آدھے سے زیادہ مکمل ہو چکا ہے، اس لیے اے آئی بی پی-پردھان منتری کرشی سیچائی یوجنا کے تحت فنڈز فراہم کیے جائیں گے اور اسے تیزی سے مکمل کیا جائے گا۔

دریائے کرشنا کے پانی میں ریاست کا حصہ حاصل کرنے کے اقدامات کا ذکر کرتے ہوئے انہوں نے کہا کہ زیر التوا پراجکٹس کو مکمل کیا جائے گا اور جنوبی تلنگانہ میں آیا کٹ کو سیراب کیا جائے گا۔ وزیرموصوف نے واضح کیا کہ این ڈی ایس اے، سی اے جی اور ویجیلنس رپورٹس کی بنیاد پر ذمہ داروں کے خلاف سخت کارروائی کی جائے گی۔وزیر موصوف نے کہا کہ کالیشورم لفٹ پروجیکٹ کے ڈیزائن، تعمیر اور دیکھ بھال کے عمل میں کئی نقائص کئی جگہوں پر سامنے آئے ہیں اور یہی میڈی گڈا ڈیم کے ٹوٹنے کی وجوہات بھی ہیں۔

انہوں نے کہا کہ تینوں آبی ذخائر میڈی گڈا، انارام اور سنڈیلا میں یکساں خرابیاں ہیں۔ انہوں نے کہا کہ انارم بیراج میں بھی گزشتہ روز اخراج کا معاملہ سامنے آیا اور دراڑیں پڑ گئیں۔ڈیم خطرے میں ہے۔ نیشنل ڈیم سیفٹی ایجنسی-این ڈی ایس اے-، ویجیلنس کمیٹی کی رپورٹ اور سی اے جی کی رپورٹ کا حوالہ دیتے ہوئے انہوں نے قانون ساز اسمبلی میں کالیشورم پراجیکٹ میں موجود خامیوں کی وضاحت کی۔سی اے جی کی رپورٹ کا حوالہ دیتے ہوئے وزیر نے کہا کہ کالیشورم پروجیکٹ میں اس طرح سے بے ضابطگیاں ہوئی ہیں جس سے ملک کو صدمہ پہنچا ہے۔

ابتدائی طور پر میڈی گڈا ڈیم کے لیے 1800 کروڑ کے کاموں کے لیے ٹنڈرطلب کیے گئے تھے لیکن بغیر کسی اجازت کے، لاگت کو بڑھا کر 4500 کروڑ روپے کر دیا گیا۔ انہوں نے کہا کہ آزاد ہندوستان کی تاریخ میں ایسی بدعنوانی کہیں اور نہیں ہوئی ہے۔ انہوں نے کہا کہ ملنا ساگر ریزروائر کی تعمیر کیلئے پچھلی حکومت نے بغیر تفصیلی پروجیکٹ رپورٹس کے 25,000 کروڑ روپے کے کنٹریکٹ دیے تھے۔

حالانکہ ریاست میں آبپاشی کے شعبے سے متعلق وائٹ پیپر پر کل بحث ہونی تھی، لیکن قانون ساز اسمبلی نے آج صبح مختلف وجوہات کی بنا پر مختصر مدت کے لیے بحث کی۔ وزیر اتم کمار ریڈی نے کہا کہ گزشتہ 10 سالوں میں آبپاشی کے شعبے میں رجحانات، پالیسیوں، بھاری قرضوں اور بدعنوانی کی وجہ سے ریاست کو ناقابل تلافی نقصان ہوا ہے۔ باوقار کالیشورم لفٹ پروجیکٹ کی تعمیر میں بے قاعدگیاں ہوئی ہیں جس سے ملک کو صدمہ پہنچا ہے۔

سی اے جی، ویجیلنس رپورٹس اور این ڈی ایس اے کی رپورٹوں کی بنیاد پر کالیشورم کی بے قاعدگیوں کے ذمہ داروں کے خلاف سخت کارروائی کی جائے گی۔ ری ڈیزائننگ کی وجہ سے، ایک سال میں پوری ریاست میں استعمال ہونے والی جملہ بجلی سے زیادہ بجلی کالیشورم سے پانی اٹھانے پر خرچ کی جائے گی اور لاگت اور فائدہ کا تناسب صرف 52 پیسے فی روپیہ ہے۔