ارکان اسمبلی کی نااہلی کی درخواستوں پراسپیکر تلنگانہ اسمبلی کااہم فیصلہ،سنجے کمارکوکلین چٹ

حیدرآباد: تلنگانہ اسمبلی کے اسپیکر پرساد کمار نے ارکان اسمبلی کی نااہلی کی درخواستوں پر ایک اہم فیصلہ سناتے ہوئے جگتیال کے ایم ایل اے ڈاکٹر سنجے کمار کو کلین چٹ دے دی ہے۔

اسپیکر نے واضح کیا کہ اس بات کے کوئی ٹھوس شواہد نہیں ملے کہ سنجے کمار نے پارٹی بدلی ہے، اس لئے وہ اب بھی بی آر ایس کے رکن کے طور پر برقرار ہیں۔ اس فیصلہ کے ساتھ ہی اب تک کلین چٹ پانے والے ایم ایل اے کی تعداد آٹھ ہو گئی ہے۔

اس فیصلہ پر ردعمل دیتے ہوئے ایم ایل اے سنجے کمار نے کہا کہ وہ صرف اپنے حلقہ کی ترقی کے لئے حکومت کے ساتھ مل کر کام کر رہے ہیں۔ انہوں نے یہ بھی دعویٰ کیا کہ ان کی تنخواہ کا ایک حصہ آج بھی بی آر ایس پارٹی کے فنڈ میں جمع ہو رہا ہے۔