تلنگانہ:وزیراعظم مودی کا فلکسی پھاڑنے پر بی جے پی کا احتجاج

حیدرآباد: وزیراعظم مودی کا فلکسی پھاڑنے پر بی جے پی نے احتجاج کیا۔یہ واقعہ تلنگانہ کے سنگاریڈی ضلع نارائن کھیڑاسمبلی حلقہ میں پیش آیا۔

اس واقعہ کے خلاف زعفرانی جماعت کے کارکنوں نے بڑی تعداد میں ناگل گدہ منڈل میں کل شب راستہ روکواحتجاج کیا۔

انہوں نے مودی کے فلکسی کو بعض نامعلوم افراد کی جانب سے پھاڑنے کے واقعہ کی شدید مذمت کی اور اس واقعہ کے ذمہ داروں کے خلاف کارروائی کرنے کامطالبہ کرتے ہوئے شدید احتجاج کیا۔

اس احتجاج کی اطلاع کے ساتھ ہی پولیس کی بھاری تعداد وہاں پہنچ گئی جس نے احتجاجیوں کے جذبات کو سرد کرنے کی کوشش کی۔اس موقع پر مظاہرین اور پولیس کے درمیان بحث وتکرار ہوگئی۔

مظاہرین، اس واقعہ کے ذمہ داروں کے خلاف کارروائی کامطالبہ کرتے ہوئے نعرے بازی بھی کررہے تھے۔اس احتجاج کے نتیجہ میں سڑک پر گاڑیوں کی آمدورفت متاثر ہوئی۔