وزیر اعلیٰ تلنگانہ نے تلنگانہ قانون ساز کونسل کے نئے ہال کا افتتاح کیا۔ خواتین کو عالمی دن کی مبارکباد
افتتاح کے بعد کونسل کے ہال میں خصوصی پوجا کی تقریب منعقد ہوئی جس کے بعد وزیر اعلیٰ نے چیئرمین اور دیگر وزراء کے ساتھ کونسل کی نشستوں پر بیٹھ کر کچھ دیر گفتگو کی۔ واضح رہے کہ ریاست کے ورثہ کی علامت سمجھے جانے والے پرانے اسمبلی ہال کو اب بین الاقوامی معیار کے مطابق نئے رنگ و روپ میں تیار کیا گیا ہے۔
حیدرآباد: تلنگانہ کے وزیر اعلی ریونت ریڈی نے آج اسمبلی کے احاطہ میں جدید سہولیات سے آراستہ قانون ساز کونسل کے نئے ہال کا افتتاح کیا۔
یہ تقریب کونسل کے چیئرمین جی سکھیندر ریڈی کی صدارت میں منعقد ہوئی جس میں نائب وزیر اعلیٰ بھٹی وکرامارکا، وزراء پی سرینواس، کومٹ ریڈی وینکٹ ریڈی، سریدھر بابو اور پونم پربھاکر کے بشمول دیگر اہم شخصیات نے شرکت کی۔
وزیر اعلیٰ نے روایتی موسیقی کے گونجتے ہوئے نغموں کے درمیان یادگاری تختی کی نقاب کشائی کی۔
افتتاح کے بعد کونسل کے ہال میں خصوصی پوجا کی تقریب منعقد ہوئی جس کے بعد وزیر اعلیٰ نے چیئرمین اور دیگر وزراء کے ساتھ کونسل کی نشستوں پر بیٹھ کر کچھ دیر گفتگو کی۔ واضح رہے کہ ریاست کے ورثہ کی علامت سمجھے جانے والے پرانے اسمبلی ہال کو اب بین الاقوامی معیار کے مطابق نئے رنگ و روپ میں تیار کیا گیا ہے۔
اس موقع پر بین الاقوامی خواتین کے عالمی دن کی مناسبت سے وزیر اعلیٰ ریونت ریڈی نے سوشل میڈیا پلیٹ فارم ایکس کے ذریعہ ریاست کی تمام خواتین کو دلی مبارکباد پیش کی۔ اپنے پیام میں انہوں نے خواتین کو خاندان کی بنیاد اور سماج کے لئے مشعلِ راہ قرار دیا۔
انہوں نے خواتین کی طاقت، صبر، محبت اور قربانی کو بے مثال قرار دیتے ہوئے کہا کہ ان کی حکومت خواتین کی فلاح و بہبود اور ترقی کے لئے کئی اہم پروگراموں پر عمل درآمد کر رہی ہے۔
وزیر اعلیٰ نے جذباتی انداز میں کہا کہ سکریٹریٹ کے مرکز میں موجود تلنگانہ تلی سے لے کر گاؤں گاؤں میں بسنے والی مائیں، بہنیں اور بیٹیاں، عوامی حکمرانی میں خودداری اور عزت نفس کی علامت ہیں۔
