تلنگانہ سی ایل پی لیڈربھٹی وکرامارکا کے پیپلز مارچ نے 932کلومیٹرمکمل کرلئے

حیدرآباد: چندرشیکھرراو زیرقیادت تلنگانہ حکومت کی ناکامیوں کو اجاگر کرنے، عوامی مسائل سے واقفیت اور پارٹی کو نچلی سطح سے دوبارہ مستحکم کرنے کے مقصد سے سی ایل پی لیڈر ملوبھٹی وکرامارکا کی یاترا جس کو پیپلز مارچ کا نام دیاگیا ہے نے 932 کلومیٹر مکمل کرلیا ہے۔

اور جلد ہی یہ یاترا ایک ہزارکلومیٹر مکمل کرلے گی۔

ان کی یاترا 82ویں دن میں داخل ہوگئی ہے۔جاریہ ماہ کے اواخر میں ضلع کھمم میں بڑے پیمانہ پر جلسہ منعقد کیاجائے گاجس کے ساتھ ہی اس یاترا کااختتام عمل میں آئے گا۔

عادل آباد ضلع کے پپری دیہات میں اپنی یاترا شروع کرنے والے بھٹی وکرامارکا جگہ جگہ عوام کے مسائل سے واقفیت حاصل کررہے ہیں۔

انہوں نے سنگارینی کالزیر کے ورکرس کے مسائل بھی معلوم کئے۔ وہ یاترا کے دوران وقفہ وقفہ سے جلسے بھی منعقد کررہے ہیں۔

اے آئی سی سی لیڈروں، انچارجس،پارٹی کے قومی جنرل سکریٹریزبھی اس یاترا میں شامل ہورہے ہیں۔

ان کی یہ یاترا فی الحال ناگرکرنول ضلع کے اچم پیٹ اسمبلی حلقہ میں جاری ہے۔ بھٹی وکرامارکا اپنے آبائی ضلع کھمم میں اس یاترا کا اختتام کریں گے۔

اس موقع پر ہونے والے جلسہ کے لئے راہل گاندھی اور پرینکاگاندھی کو مدعو کئے جانے پر غور کیاجارہا ہے۔