تلنگانہ:راشن کارڈمنسوخ کرنے بڑنگ پیٹ کارپوریشن کے ڈپٹی میئرکا اعلان

حیدرآباد: تلنگانہ کے ضلع رنگاریڈی کی بڑنگ پیٹ کارپوریشن کے ڈپٹی میئر اے شیکھر نے اعلان کیا کہ وہ اپنا راشن کارڈ منسوخ کر رہے ہیں۔

انہوں نے کہا کہ ان کی والدہ کو پنشن بھی نہیں چاہیے۔ انہوں نے مشورہ دیا کہ اگر ریاست کی مالی حالت کو بہتر بنانا ہے تو ان جیسے افراد، تاجروں، مالی وسائل رکھنے والے افراد اور سرکاری ملازمین کو رضاکارانہ طور پر سرکاری فلاحی اسکیموں کو ترک کرنا چاہیے۔

انہوں نے بتایا کہ وہ 23 سال سے سیاست میں ہیں اور بالاپور سرپنچ، بڑنگ پیٹ سٹی پنچایت کونسلر کے طور پر کام کر چکے ہیں اور فی الحال کارپوریشن کے ڈپٹی میئر ہیں۔

انہوں نے کہا کہ 23 سال سے ان کی والدہ پنشن مانگ رہی ہیں لیکن انہوں نے اس سمت میں کوئی کوشش نہیں کی۔ شیکھر نے رائے دی کہ صرف ان افرادکو پنشن دینا چاہئے جن کے بچے اپنے والدین کی کفالت کرنے سے قاصر ہیں۔

نااہل افراد کو پنشن اور راشن کارڈ جیسی اسکیمیں فراہم کرنے سے مستحق افراد کو نقصان ہوگا۔ انہوں نے کہا کہ انہوں نے راشن کارڈ منسوخ کرنے کا فیصلہ کیا کیونکہ انہیں لگتا ہے کہ سرکاری اسکیمات حاصل کرنا بے معنی ہے جب کہ ان کے پاس بہت زیادہ مالی وسائل ہیں۔