تلنگانہ:بیٹی کی شادی سے 48 گھنٹے پہلے باپ کی موت
بیٹی کی شادی سے 48گھنٹے پہلے باپ کی موت ہوگئی جس کے بعد شادی کے گھر میں کہرام مچ گیا اور یہ گھر جہاں خوشیاں منائی جارہی تھی، ماتم کدہ میں تبدیل ہوگیا۔
حیدرآباد: بیٹی کی شادی سے 48گھنٹے پہلے باپ کی موت ہوگئی جس کے بعد شادی کے گھر میں کہرام مچ گیا اور یہ گھر جہاں خوشیاں منائی جارہی تھی، ماتم کدہ میں تبدیل ہوگیا۔
یہ افسوسناک واقعہ تلنگانہ کے ضلع کھمم میں پیش آیا۔تفصیلات کے مطابق پولی پلی گاؤں کے 42سالہ اوپیندر ریڈی کی دوبیٹیاں ہیں۔
اس کی بڑی بیٹی کی شادی 3ستمبر کو ہونے والی تھی جس کی شادی کے سلسلہ میں اس کے باپ نے انتظامات کئے تھے۔اس نے بیٹی کی شادی کے کارڈس رشتہ داروں اور دوست احباب میں تقسیم کئے۔
بعد ازاں وہ گھر پہنچا۔وہ کھیت میں پانی ڈالنے کیلئے کھیت گیا جہاں اس نے موٹر کو آن کیا تاہم موٹرآن نہیں ہوئی جس کے بعد اس نے موٹر کی مرمت کا کام شروع کیااسی دوران شاک لگنے سے اس کی موقع پر ہی موت ہوگئی۔
مقامی کسانوں نے اس کو دیکھا اور اس کے ارکان خاندان کو اس بات کی اطلاع دی۔اس واقعہ کے بعد شادی کے گھر میں سوگ اور ماتم دیکھاگیا۔اس واقعہ سے گاوں میں غم کی لہردوڑگئی۔
