کرناٹک کے بھدرا سینکچری میں شیرنی مردہ پائی گئی

چکمگلور: کرناٹک کے چکمگلور ضلع میں بھدرا وائلڈ لائف سینکچری کے لکاولی رینج میں ایک شیرنی جس کی عمر تقریباً سات سال بتائی گئی ہے مردہ پائی گئی۔

جنگلات کے اہلکاروں کو معمول کی گشت کے دوران لاش ملی۔ ابتدائی تحقیقات سے معلوم ہوا ہے کہ اس کی موت لڑائی میں لگنے والے زخموں کی وجہ سے ہوئی۔

شیرنی کی لاش کا پوسٹ مارٹم کیا گیا اور مزید تفتیش کے لیے نمونے حاصل کیے گئے۔ جنگلات کے حکام نے جمعہ کو بتایا کہ گولیوں کے زخموں کی جانچ کے لیے لاش کو میٹل ڈیٹیکٹر سے بھی چیک کیا گیا۔

پروٹوکول کے مطابق ان باقیات کو اسسٹنٹ فاریسٹ کنزرویٹر سنتوش ساگر، جنگلی حیات کے کارکن جی ویریش اور مدھو موگتھی ہلی اور مقامی پنچایت ممبران کی موجودگی میں جلا کر تباہ کیا گیا۔