تلنگانہ: عادی مجرمین کا گروہ گرفتار

حیدرآباد: تلنگانہ کے کاماریڈی ضلع پولیس نے عادی مجرموں کے گروہ کو گرفتار کرتے ہوئے آن لائن دھوکہ دہی کے سنسنی خیز معاملہ کا پردہ فاش کیا۔

پولیس کے مطابق یہ گروہ فیس بک پر کار ڈیلنگ کے نام پر معصوم عوام کو نشانہ بناتے ہوئے کرایہ پر حاصل کی گئی گاڑیوں کی نمبر پلیٹ تبدیل کر کے جعلی آر سی، آدھار اور دیگر شناختی کارڈ تیار کرتا اور ان ہی گاڑیوں کو لاکھوں روپے میں فروخت کر دیتاتھا۔

بعد ازاں وہ گاڑیاں دوبارہ چوری کر کے اصل مالکان کو واپس لوٹا دیتا اور موبائل نمبروں کو تبدیل کرتے ہوئے مسلسل فراررہتا۔ ضلع کاماریڈی ہیس پی راجیش چندرا کی ہدایت پر اے ایس پی کی نگرانی میں خصوصی ٹیم تشکیل دی گئی جس نے تحقیقات میں تیز پیدا کرتے ہوئے مچارَیڈی پولیس اسٹیشن کی حدود میں درج شکایت پر کارروائی کی۔

اس دوران گروہ کے چھ ارکان کو گرفتار کر لیا گیا جبکہ ایک ملزم تاحال مفرور ہے۔ گرفتار شدگان کی شناخت محمد ایاز ، محمد زاہد علی ، پُرتھوی جگدیش ، راچرل شیو کرشنا، کرن کوٹ ساکیت اور وِویک کی حیثیت سے کی گئی۔

پولیس نے ان کے قبضے سے انووا، ایرٹیگا اور بالینو کاریں، 15 موبائل فون، ایک لیپ ٹاپ، 10 سم کارڈ، خالی چِپ کارڈ، جعلسازی شدہ آر سی اور گاڑیوں کے جی پی ایس آلات برآمد کیے۔

پولیس تحقیقات میں یہ بھی انکشاف ہوا کہ یہ نٹ ورک پہلے ہی شنکرپلی، منچال، رام چندراپورم، چندانگر، میاں پور اور عطاپورپولیس اسٹیشنوں میں درج کئی مقدمات میں ملوث رہا ہے۔