تلنگانہ اب گھر بنانا ہوگا آسان؟
100گز تک کے پلاٹس پر تعمیر کے لیے اجازت نامے کی شرط ختم کرنے کی تجویز، سیلر اور پارکنگ کے قواعد میں بھی تبدیلی کا امکان
حیدرآباد: تلنگانہ میں اپنا گھر تعمیر کرنے کا خواب دیکھنے والوں کے لیے اچھی خبر ہے۔ ریاستی حکومت عمارتوں کی تعمیر سے متعلق موجودہ قواعد میں بڑی تبدیلیاں کرنے کی تیاری کر رہی ہے۔ خاص طور پر چھوٹے پلاٹس پر مکان تعمیر کرنے والے متوسط طبقے کے خاندانوں کو راحت پہنچانے کے لیے نئے بلڈنگ رولز تیار کیے جا رہے ہیں۔
موجودہ قوانین کے تحت چھوٹے پلاٹس پر گھر تعمیر کرنے کے لیے بھی مختلف شرائط اور اجازت ناموں کے مراحل سے گزرنا پڑتا ہے۔ پارکنگ اور عمارت کے اطراف لازمی خالی جگہ چھوڑنے کے قواعد کی وجہ سے محدود اراضی رکھنے والے افراد کو کافی مشکلات کا سامنا کرنا پڑتا ہے۔ حکومت اب ان مسائل کو کم کرنے کے لیے ایک جامع بلڈنگ رولز تیار کرنے پر غور کر رہی ہے۔
نئی تجاویز میں سب سے اہم تبدیلی چھوٹے پلاٹس پر تعمیرات سے متعلق ہے۔ فی الحال 75 مربع گز تک کے پلاٹس پر مکان تعمیر کرنے کے لیے اجازت نامے سے استثنیٰ حاصل ہے۔ حکومت اس حد کو بڑھا کر 100 مربع گز کرنے پر غور کر رہی ہے۔ اگر یہ تجویز منظور ہو جاتی ہے تو 100 مربع گز تک کے پلاٹس پر گھر تعمیر کرنے والوں کو اجازت ناموں کے لیے سرکاری دفاتر کے چکر لگانے کی ضرورت نہیں پڑے گی۔
عمارت کے اطراف خالی جگہ کے قواعد میں نرمی
چھوٹے پلاٹس پر تعمیر کرنے والوں کو زیادہ تعمیراتی جگہ فراہم کرنے کے لیے عمارت کے اطراف لازمی چھوڑی جانے والی خالی جگہ کے فاصلے میں بھی کمی کی تجویز ہے۔ حکام اس فاصلے کو زیادہ سے زیادہ 20 فیصد تک کم کرنے کے امکان کا جائزہ لے رہے ہیں۔ اس تبدیلی سے محدود رقبے پر بھی پہلے کے مقابلے میں زیادہ تعمیراتی جگہ دستیاب ہو سکتی ہے۔
سیلر کی تعمیر کے قواعد بھی بدل سکتے ہیں
شہری علاقوں میں پارکنگ کے بڑھتے ہوئے مسئلے کو حل کرنے کے لیے سیلر کی تعمیر سے متعلق ضوابط میں بھی تبدیلی کی تجویز پیش کی گئی ہے۔ فی الحال 900 مربع گز اراضی ہونے پر ہی سیلر کی تعمیر کی اجازت دی جاتی ہے، تاہم اس حد کو کم کرکے 600 مربع گز کرنے پر غور کیا جا رہا ہے۔
اسی طرح 750 سے 1,000 مربع میٹر رقبے پر تعمیر ہونے والی عمارتوں کے لیے موجودہ ایک سیلر کی اجازت کو بڑھا کر دو سیلر کرنے کی تجویز بھی زیر غور ہے۔ اس سے عمارتوں میں پارکنگ کی گنجائش بڑھنے اور سڑکوں پر گاڑیاں کھڑی کرنے کے مسئلے میں کمی آنے کی توقع ہے۔
بلڈرز کو بھی مل سکتی ہے راحت
نئی تجاویز میں بلڈرز کے لیے بھی اہم تبدیلی شامل ہے۔ تعمیراتی کاموں میں اضافی بوجھ بننے والے مارٹگیج (Mortgage) ضابطے کو مخصوص سائز کی عمارتوں کے لیے مکمل طور پر ختم کرنے کے امکان پر غور کیا جا رہا ہے۔
واضح رہے کہ مارٹگیج سے مراد جائیداد کو ضمانت کے طور پر رکھنا ہے۔ بعض تعمیراتی ضوابط کے تحت بلڈر کو اپارٹمنٹ کی تعمیر کے دوران عمارت کے کچھ فلیٹس یا مخصوص حصے متعلقہ سرکاری ادارے کے پاس بطور ضمانت رکھنا پڑتے ہیں۔ مقررہ شرائط پوری ہونے کے بعد یہ ضمانت واپس حاصل کی جا سکتی ہے۔ مجوزہ تبدیلی نافذ ہونے سے بلڈرز کو اس شرط سے راحت مل سکتی ہے۔
ابھی تجاویز کو حتمی منظوری نہیں
یہ تمام تبدیلیاں فی الحال محکمہ بلدی نظم و نسق کے عہدیداروں کی جانب سے تیار کردہ مسودہ تجاویز کا حصہ ہیں۔ حکومت کی جانب سے ان پر حتمی فیصلہ اور سرکاری احکامات جاری ہونے کے بعد ہی نئے بلڈنگ رولز نافذ ہوں گے۔
اس طرح تلنگانہ حکومت کا مقصد پرانے اور مختلف اوقات میں تبدیل کیے گئے تعمیراتی قوانین کو یکجا کرکے ایک جامع ضابطہ تیار کرنا ہے۔ سال 2012 میں بنائے گئے موجودہ بلڈنگ رولز میں اب تک 62 مرتبہ الگ الگ ترامیم کی جا چکی ہیں۔ حکومت اب ان تمام تبدیلیوں کو یکجا کرکے عام شہریوں اور بلڈرز دونوں کے لیے آسان قوانین متعارف کرانے کی تیاری کر رہی ہے۔