تلنگانہ: پولیس نے بی آرایس قائد دیوی پرساد کی رہائش گاہ کی تلاشی لی
انچارج دیوی پرساد، ایم ایل اے اور ڈی سی ایم ایس چیئرمین نے اس کارروائی کی سخت الفاظ میں مذمت کرتے ہوئے اسے سیاسی انتقام قرار دیا۔ انہوں نے کہا کہ بلدی انتخابات میں بی آر ایس کی یقینی جیت اور بڑھتی ہوئی عوامی مقبولیت سے بوکھلا کر کانگریس پارٹی پولیس کا غلط استعمال کر رہی ہے۔
حیدرآباد: تلنگانہ کے بلدی انتخابات کے سلسلہ میں ظہیر آباد بی آرایس کے انچارج دیوی پرساد کی رہائش گاہ پر کل شب پولیس نے اچانک تلاشی لی۔
اس وقت دیوی پرساد، مقامی ایم ایل اے کے مانک راؤ اور ڈی سی ایم ایس چیئرمین شیو کمار کے ساتھ اتوار کو سابق وزیر ہریش راؤ کے دورہ ظہیر آباد کی تیاریوں پر تبادلہ خیال کر رہے تھے۔
بی آر ایس قائدین کا الزام ہے کہ برسراقتدار کانگریس پارٹی کے اشارے پر پولیس نے رات 11 بجے سے 2 بجے تک گھر کے کونے کونے کی تلاشی لی، تاہم وہاں سے کوئی قابل اعتراض چیز برآمد نہیں ہوئی جس کے بعد پولیس کو خالی ہاتھ لوٹنا پڑا۔
انچارج دیوی پرساد، ایم ایل اے اور ڈی سی ایم ایس چیئرمین نے اس کارروائی کی سخت الفاظ میں مذمت کرتے ہوئے اسے سیاسی انتقام قرار دیا۔ انہوں نے کہا کہ بلدی انتخابات میں بی آر ایس کی یقینی جیت اور بڑھتی ہوئی عوامی مقبولیت سے بوکھلا کر کانگریس پارٹی پولیس کا غلط استعمال کر رہی ہے۔
ان کا مزید کہنا تھا کہ ہریش راؤ کے انتخابی دورہ میں خلل ڈالنے اور خوف و ہراس پیدا کرنے کی یہ کوششیں ناکام ہوں گی کیونکہ عوام کانگریس کی پالیسیوں سے نالاں ہیں اور ظہیر آباد میونسپلٹی پر بی آر ایس کا جھنڈا لہرانا اب طے ہے۔
