تلنگانہ پبلک سرویس کمیشن کے پہلے مرحلہ کا امتحان اِس تاریخ کو ہوگا

حیدرآباد: تلنگانہ پبلک سرویس کمیشن (ٹی جی پی ایس سی) کے چیئرمین مہیندر ریڈی نے جمعہ کو کہا کہ 9 جون کو منعقد ہونے والے پہلے مرحلے کے ابتدائی امتحانات میں 4.03 لاکھ طلبہ کے شرکت کرنے کی امید ہے۔

ایک سرکاری بیان کے مطابق، چیف سکریٹری (سی ایس) شانتی کماری نے بیج اور کھادوں کی فراہمی، مشن بھاگیرتھ کے تحت دیہی گھریلو سروے اور اضلاع میں اسکول یونیفارم کی سلائی کا بھی جائزہ لیا۔

جائزہ میٹنگ کے دوران مسٹر ریڈی نے اس بات کی تصدیق کی کہ پہلے مرحلے کے ابتدائی امتحانات کے ہموار انعقاد کے لئے تمام انتظامات کئے گئے ہیں، جو31 اضلاع کے 897 امتحانی مراکز میں منعقد کیے جائیں گے۔

انہوں نے کہا کہ موثر مانیٹرنگ اور بلاتعطل امتحانی انعقاد کو یقینی بنانے کے لئے 20 مراکز کے گروپس کے لیے علاقائی رابطہ کار مقرر کیے گئے ہیں۔ اس کے علاوہ ضلع انتظامیہ اور محکمہ پولیس دونوں کے نوڈل افسران کو آرڈینیشن کے لیے مقرر کیا گیا ہے۔

 بائیو میٹرک مبصرین کو تربیت دینے کے لیے احتیاطی تدابیر اختیار کی گئی ہیں اور کسی بھی ممکنہ مسائل سے نمٹنے کے لیے مناسب بائیو میٹرک آلات فراہم کیے گئے ہیں۔

چیف سکریٹری نے کہا کہ ضلع کلکٹروں کو واضح ہدایات جاری کر دی گئی ہیں اور چیف سپرنٹنڈنٹ، سپروائزرس اور دیگر عملے کی تربیت مکمل کر لی گئی ہے۔

انہوں نے کلکٹروں سے ضلع میں پولیس اور دیگر عہدیداروں کے ساتھ مشترکہ میٹنگیں بلانے کی اپیل کی تاکہ صورتحال پر کڑی نظر رکھی جاسکے اور اس بات کو یقینی بنایا جاسکے کہ امتحانات کا انعقاد ہموار، منصفانہ اور پرامن طریقے سے کیا جائے۔