تلنگانہ: ضلع کھمم میں بارش اورتیزہوائیں۔ 50 سے زائد بجلی کے کھمبے گر گئے۔ ٹرانسفارمرس اور فیڈرس کو نقصان پہنچا

حیدرآباد: تلنگانہ کے ضلع کھمم میں بے موسم بارش اورتیزہواوں کے سبب 50 سے زائد بجلی کے کھمبے گر گئے۔ 9 علاقوں میں ٹرانسفارمرس اور فیڈرس کو نقصان پہنچا۔

پنڈلا پلی میں بجلی کا ایک ٹاور گر گیا جس کی وجہ سے کئی دیہاتوں میں بجلی کی سپلائی بند ہو گئی۔ چنتکانی اور ناگولاونچا میں بجلی کی بحالی کا کام جاری ہے۔

اسی دوران محکمہ موسمیات نے پیش قیاسی کی ہے کہ آئندہ پانچ دنوں تک ریاست کے مختلف حصوں میں ہلکی اوسط بارش کا امکان ہے۔ اس سلسلے میں مختلف اضلاع کیلئے ایلو الرٹ جاری کر دیا گیا ہے۔

دوسری جانب بعض اضلاع کیلئے آرینج الرٹ جاری کیاگیا ہے۔گذشتہ شب بھدرادی کوتہ گوڑم، کھمم، سوریا پیٹ اور ناگرکرنول اضلاع میں بارش ہوئی۔

عادل آباد، آصف آباد، منچریال، نرمل، جگتیال، راجنا سرسلہ، کریم نگر، پداپلی اور جوگولامبا گدوال اضلاع میں ژالہ باری ہوئی۔محکمہ موسمیات نے کہا کہ منگل کو سدی پیٹ، یادادری بھونگیر، رنگاریڈی، وقارآباد اور محبوب نگر اضلاع میں گرج چمک اور تیز ہواؤں کے ساتھ موسلا دھار بارش ہوگی۔

کوتہ گوڑم، کھمم، سدی پیٹ، بھونگیر، رنگاریڈی، حیدرآباد، میڑچل ملکاجگری، وقارآباد، سنگاریڈی، کاماریڈی، محبوب نگر اور ناگرکرنول اضلاع میں اوسط بارش کا امکان ہے۔