تلنگانہ میں گاڑی مالکان کو بڑی راحت، اب آر ٹی اے دفاتر کے چکر ختم!

حیدرآباد: تلنگانہ میں گاڑی رکھنے والوں کے لیے محکمہ ٹرانسپورٹ نے ایک اہم سہولت متعارف کروائی ہے۔ اب گاڑی کی ملکیت منتقل کرنے، دوسری ریاست میں گاڑی لے جانے کے لیے این او سی حاصل کرنے اور ای-کے وائی سی کی تفصیلات اپ ڈیٹ کرنے کے لیے آر ٹی اے دفاتر کے چکر لگانے کی ضرورت نہیں ہوگی۔ یہ تینوں خدمات وہان سٹیزن سروسیز پورٹل کے ذریعے آن لائن دستیاب کردی گئی ہیں۔ ان سہولتوں سے استفادہ کرنے کے لیے آدھار سے منسلک موبائل نمبر پر آنے والے او ٹی پی کے ذریعے تصدیق کرنا ضروری ہوگا۔

نئی سہولت کے تحت گاڑی فروخت کرنے والے اور خریدنے والے دونوں کو آن لائن کارروائی مکمل کرنی ہوگی۔ فروخت کرنے والے کو گاڑی کی تفصیلات، خریدار کی معلومات اور متعلقہ آر ٹی او کا نام درج کرکے آدھار او ٹی پی کے ذریعے تصدیق کرنی ہوگی۔ اس کے بعد خریدار کو ایک درخواست نمبر موصول ہوگا، جس کے ذریعے وہ اپنا موجودہ پتہ درج کرے گا، گاڑی سے متعلق نیشنل کرائم ریکارڈس بیورو کی رپورٹ کا جائزہ لے گا اور مقررہ فیس ادا کرے گا۔ دونوں کی جانب سے آن لائن تصدیق مکمل ہونے کے بعد درخواست منظور کی جائے گی اور متعلقہ آر ٹی او رجسٹریشن سرٹیفکیٹ جاری کرے گا۔

اسی طرح اگر کوئی گاڑی مالک اپنی گاڑی دوسری ریاست منتقل کرنا چاہتا ہے تو وہ بھی آن لائن این او سی کے لیے درخواست دے سکتا ہے۔ اس کے لیے گاڑی کی تفصیلات، منتقلی کی وجہ، منزل ریاست اور متعلقہ آر ٹی او کی معلومات درج کرنے کے ساتھ مقررہ فیس ادا کرنی ہوگی۔ اس کے علاوہ فارم 28 اور نیشنل کرائم ریکارڈس بیورو کی رپورٹ بھی اپ لوڈ کرنا ہوگی۔ درخواست منظوری کے لیے متعلقہ آر ٹی او کو بھیجی جائے گی۔

تیسری سہولت کے تحت گاڑی مالکان اپنے ای-کے وائی سی کی تفصیلات بھی آن لائن اپ ڈیٹ کرسکتے ہیں۔ اس کے لیے گاڑی اور آدھار کی معلومات کی او ٹی پی کے ذریعے تصدیق کے ساتھ آدھار کارڈ اور اصل رجسٹریشن سرٹیفکیٹ کی نقول اپ لوڈ کرنا ضروری ہوگا۔ اس کے بعد درخواست منظوری کے لیے متعلقہ آر ٹی او کو بھیجی جائے گی۔

محکمہ ٹرانسپورٹ نے گاڑی مالکان کو مشورہ دیا ہے کہ درخواست جمع کرنے سے پہلے تمام تفصیلات اچھی طرح جانچ لیں، خاص طور پر ای-کے وائی سی کے معاملے میں احتیاط برتیں۔ حکام نے واضح کیا ہے کہ درخواست جمع ہونے کے بعد غلطیوں کی اصلاح ممکن نہیں ہوگی۔ ایسی صورت میں پہلے درخواست واپس لے کر نئی درخواست دینا ہوگی اور پہلے جمع کردہ فیس بھی واپس نہیں کی جائے گی۔

محکمہ ٹرانسپورٹ کے مطابق ان نئی آن لائن سہولتوں سے گاڑی مالکان کا وقت بچے گا، کارروائی آسان ہوگی اور آر ٹی اے دفاتر کے بار بار چکر لگانے کی ضرورت بھی کم ہوجائے گی۔