خصوصی بسوں میں کرایوں میں 50 فیصد اضافہ ۔تلنگانہ آرٹی سی کا اعلان

حیدرآباد: تلنگانہ آر ٹی سی نے اعلان کیا ہے کہ اس ماہ کی 11 تاریخ تک خصوصی بسوں میں کرایوں میں 50 فیصد اضافہ کیا گیا ہے۔

حکام کا کہنا ہے کہ مسافروں کے ہجوم کے مطابق بسیں چلائی جا رہی ہیں، تاہم بعض اوقات مسافر نہ ہونے کی صورت میں بسوں کو فوری طور پر واپس لانا پڑ رہا ہے۔ انتظامی اخراجات کو پورا کرنے کے لیے صرف اسپیشل بسوں کے کرایے بڑھائے گئے ہیں۔

راکھی تہوار کے پیشِ نظر ریاست بھر کے آر ٹی سی بس اڈوں پر مسافروں کا رش دیکھا جا رہا ہے۔ سکندرآباد جے بی ایس میں مسافر بسوں کے لیے انتظار کر رہے ہیں۔

آر ٹی سی کی جانب سے ’’راکھی اسپیشل‘‘ کے نام سے خصوصی بس سروسز چلائی جا رہی ہیں۔ ایکسپریس بسیں مسافروں سے کھچا کھچ بھری ہوئی ہیں جبکہ آندھرا پردیش جانے والی بسوں کے لیے بھی عوام لمبی قطاروں میں کھڑے نظر آ رہے ہیں۔