تلنگانہ کی کانگریس حکومت کی کارکردگی اطمینان بخش:پروفیسر کودنڈارام

حیدرآباد: تلنگانہ جناسمیتی کے سربراہ پروفیسرکودنڈارام نے تلنگانہ کی کانگریس حکومت کی کارکردگی پراطمینان کااظہار کیا۔

انہوں نے ایک تلگونیوز چینل کو دیئے گئے انٹرویو میں واضح کیاکہ نئی ایک ماہ کی جمہوری حکومت پر عوام میں خوشی پائی جاتی ہے۔

یہ کہتے ہوئے کہ اسی طرز کی حکمرانی کو جاری رکھنے کی ضرورت ہے،انہوں نے کہا کہ یہ اچھے نتائج کی علامت ہے۔انہوں نے نشاندہی کی کہ نئی حکومت بے روزگاری اوردیگر مسائل پر توجہ دے رہی ہے۔

گذشتہ حکومت کے دوران روزانہ نئے تناو کی صورتحال ہواکرتی تھی اور وہ دیگر جماعتوں کے ساتھ مل کر احتجاج بھی کیاکرتے تھے۔

پروفیسرکودنڈرام نے یاددلایاکہ پیشرو حکومت کے دوران کسی مسئلہ پر وزیراعلی سے نمائندگی کا فیصلہ کیاگیا تھا، اسی کے حصہ کے طورپروہ، سی پی آئی اور سی پی ایم لیڈران کیمپ آفس پرگتی بھون جانے والے تھے تاہم سی پی آئی لیڈروں کو ان کے دفاتر اور ان کوان کے گھر پرنظربند کردیاگیا تھا۔آج صورتحال اس کے برعکس ہے۔