21آوارہ کتوں کی موت نے پولیس کو بھی پریشانی میں ڈال دیا

حیدرآباد: تلنگانہ میں افسوسناک واقعہ پیش آیا جہاں نامعلوم ملزم نے 21 آوارہ کتوں کو گولیاں مار کر ہلاک کر دیا۔ میڈیا رپورٹس کے مطابق اس ضمن میں اسلحہ اور جانوروں پر ظلم کرنے کی دفعات کے تحت مقدمہ درج کر لیا گیا تاہم اب تک کوئی گرفتاری عمل میں نہیں لائی گئی۔

یہ واقعہ محبوب نگر ضلع کے پوناکل گاؤں میں پیش آیا جو نیشنل ہائی وے سے تقریباً 2 کلو میٹر کی دوری پر ہے۔ نامعلوم شخص نے اندھا دھند فائرنگ کی جس میں متعدد آوارہ کتے زخمی بھی ہوئے۔ متعلقہ محکمہ نے ہلاک ہونے والے کتوں کا پوسٹ مارٹم بھی کیا۔

سب انسپکٹر پولیس سرینواس کے مطابق آوارہ کتوں کو پہلے زہر دیا گیا اور پھر قریب سے گولیاں ماری گئیں۔ انہوں نے بتایا کہ واقعہ میں مقامی سطح پر تیار شدہ اسلحہ استعمال کیا گیا۔

گاؤں میں سی سی ٹی وی نہ ہونے کے باعث پولیس کو ملزم کی گرفتاری میں مشکلات کا سامنا ہے۔ جائے وقوعہ سے شواہد اکٹھے کیے جا رہے ہیں۔ پولیس کے مطابق دو کتوں کی موت بغیر گولی لگنے کے باعث ہوئی جس سے شبہ ہوتا ہے کہ ان کو پہلے زہر دیا گیا تھا۔