دنگل فلم کی ساتھی اداکارہ کی اچانک موت سے زائرہ وسیم بھی صدمہ میں
زائرہ وسیم نے کہا کہ جس لمحے میں نے یہ خبر سنی تو مجھے وہ وقت یاد آگیا جو میں نے کام کے دوران سہانی کے ساتھ گزارا تھا، وہ ایک بہترین شخصیت کی مالک تھیں اور ہم دونوں کی بہت سی یادیں ساتھ ہیں۔
سری نگر:اسلام کی خاطر بالی ووڈ کو الوداع کہنے والی سابقہ بالی ووڈ اداکارہ زائرہ وسیم نے فلم ‘دنگل’ کی اپنی ساتھی اداکارہ سہانی بھٹناگر کی اچانک موت پر گہرے دُکھ کا اظہار کیا ہے۔
میڈیا سے بات چیت کرتے ہوئے زائرہ وسیم نے کہا کہ مجھے سہانی بھٹناگر کی اچانک موت کی خبر سُن کر یقین نہیں آیا اور یہی دُعا کی کہ کاش یہ صرف ایک افواہ ہو، اس خبر میں کوئی سچائی نہ ہو۔
زائرہ وسیم نے کہا کہ جس لمحے میں نے یہ خبر سنی تو مجھے وہ وقت یاد آگیا جو میں نے کام کے دوران سہانی کے ساتھ گزارا تھا، وہ ایک بہترین شخصیت کی مالک تھیں اور ہم دونوں کی بہت سی یادیں ساتھ ہیں۔
سابقہ اداکارہ نے کہا کہ میں تصور بھی نہیں کرسکتی کہ اس مشکل وقت میں سہانی کے والدین پر کیا گزر رہی ہوگی، میری دُعا ہے کہ اس مشکل وقت میں اُنہیں ہمت اور صبر عطا ہو۔
زائرہ وسیم نے اپنے انسٹاگرام اسٹوری میں کہا کہ میں سہانی بھٹناگر کی اچانک موت کی خبر سُن کر شدید صدمہ میں ہوں، اس ناقابل یقین حد تک مشکل وقت میں میری دُعائیں سہانی کے والدین کے ساتھ ہیں۔
اُنہوں نے مزید کہا کہ یہ سوچ کر میرا دل دُکھ سے بھر رہا ہے کہ سہانی کے والدین خود کو کیسے سنبھال رہے ہوں گے، وہ اپنی بیٹی کی موت کو کیسے برداشت کریں گے۔
واضح رہے کہ عرصہ قبل 19 سالہ اداکارہ سہانی بھٹناگر کی ٹانگ میں فریکچر ہوا تھا جس کے علاج کے لیے اُنہوں نے دوائیاں لی تھیں، ان دوائیوں نے اداکارہ کی صحت پر منفی اثر ڈالا تھا جس کے بعد اُن کے پورے جسم میں پانی بھر گیا تھا اور 16 فروری کی شام وہ چل بسیں۔
اداکارہ کی اچانک موت پر اُن کے مداح اور شوبز شخصیات کی جانب سے گہرے دُکھ اور افسوس کا اظہار کیا جارہا ہے۔ واضح رہے کہ سہانی بھٹناگر نے بالی ووڈ کے مسٹر پرفیکشنسٹ عامر خان کی سُپر ہٹ فلم “دنگل” میں اُن کی بیٹی ببیتا کماری کے بچپن کا کردار ادا کیا تھا، دنگل کے بعد سہانی نے اداکاری سے وقفہ لے لیا تھا کیونکہ وہ اپنی پڑھائی پر توجہ دینا چاہتی تھیں۔
اس فلم میں عامر خان کو پہلوان مہاویر سنگھ پھوگاٹ کے کردار میں دکھایا گیا تھا جو اپنی بیٹیوں گیتا پھوگاٹ اور ببیتا کماری کو ہندوستان کی پہلی عالمی سطح کی خاتون پہلوان بننے کے لیے تربیت دیتا ہے۔
فاطمہ ثنا شیخ اور سانیا ملہوترا نے عامر خان کی بیٹیوں کے بالغ کردار جبکہ زائرہ وسیم اور سہانی بھٹناگر نے ان کے بچپن کے کردار ادا کیے تھے۔
