زبان کاٹ کر دیوی پرتما کے نذر کرنے والا شخص اسپتال میں داخل

فتح پور: اترپردیش کے ضلع فتح پور میں منگل کو عقیدے کے نام پر ایک بزرگ نے جوڑوں کے درد سے نجات پانے کے لئے اپنی زبان دیوی پرتما کے نذر کردیا۔ بزرگ کو اسپتال میں داخل کرایا گیا ہے جہاں اس کی حالت بہتر بتائی گئی ہے۔

پولیس ذرائع نے بتایا کہ کلیان پور تھانہ علاقے کے گرام گرگولی باشندہ بابورام پاسوان(65) اپنے گھٹنوں کے درد سے کافی پریشان رہتا تھا۔کچھ لوگوں نے اسے مشورہ دیا کہ اگر اسے درد سے نجات حاصل کرنی ہے تو وہ اپنی زبان دیوی ماں کے قدموں میں پیش کردے۔

ناخواندہ بزرگ آج صبح بغیر گھر والوں کو اطلاع دئیے دیوی مندر نکل گیا اور بلیڈ سے زبان کاٹ کر دیوی کی مورتی پر چڑھا دیا۔ خون نکلنے سے وہ بیہوش ہوگیا۔ درشن کررہے عقیدت مندوں نے واقعہ کی اطلاع پولیس کو دی۔ پولیس نے اسے اسپتال میں داخل کرایا۔ ڈاکٹروں کے مطابق بزرگ کی حالت اب بہتر ہے۔