خصوصی عدالت نے اروند کیجریوال کو تہاڑ جیل سے رہا کرنے کا حکم دے دیا
سپریم کورٹ میں داخل کردہ اپنی خصوصی رخصت کی درخواست میں، عام آدمی پارٹی کے کنوینر نے اپنی گرفتاری اور اس کے بعد کے ریمانڈ کے احکامات کو چیلنج کیا تھا، اور بدعنوانی کے معاملے میں ضمانت کے لیے بھی دباؤ ڈالا تھا۔
نئی دہلی: سپریم کورٹ نے دہلی شراب گھوٹالہ کیس میں دہلی کے چیف منسٹر اروند کیجریوال کو ضمانت دے دی ہے۔ اپنے فیصلے میں، سپریم کورٹ نے کہا کہ "شرائط کا فیصلہ ٹرائل کورٹ کرے گی۔” دو ججوں پر مشتمل ڈویژن بنچ نے فیصلہ سنایا۔ جسٹس اجل بھویان نے سی بی آئی کے ذریعہ گرفتاری کے وقت پر سنگین سوالات اٹھائے اور مرکزی ایجنسی کے ذریعہ "دیر سے گرفتاری” کو غیر منصفانہ قرار دیا۔
اروند کیجریوال کو ای ڈی نے 21 مارچ کو گرفتار کیا تھا۔ اس کے بعد 10 دن کی پوچھ تاچھ کے بعد انہیں تہاڑ بھیج دیا گیا۔ سپریم کورٹ میں داخل کردہ اپنی خصوصی رخصت کی درخواست میں، عام آدمی پارٹی کے کنوینر نے اپنی گرفتاری اور اس کے بعد کے ریمانڈ کے احکامات کو چیلنج کیا تھا، اور بدعنوانی کے معاملے میں ضمانت کے لیے بھی دباؤ ڈالا تھا۔
12 جولائی کو سپریم کورٹ نے انفورسمنٹ ڈائریکٹوریٹ (ای ڈی) کے ذریعہ درج منی لانڈرنگ کیس میں چیف منسٹر کیجریوال کو عبوری ضمانت پر رہا کرنے کا حکم دیا تھا۔ تاہم سی بی آئی کے ہاتھوں گرفتار ہونے کے بعد وہ جیل سے باہر نہیں آ سکے۔ سپریم کورٹ کے فیصلہ کے بعدخصوصی عدالت نے اروند کیجریوال کو تہاڑ جیل سے رہا کرنے کا حکم دے دیا ۔
