بڑے لوگ ہیں‘ پرشانت کشور کا راہول گاندھی پر طنز

موتیہاری(بہار): سیاسی حکمت عملی سازسے سیاسی کارکن بنے پرشانت کشور نے ہفتہ کے دن کانگریس قائد راہول گاندھی کی بھارت جوڑو یاترا کی طنزیہ تعریف کی۔ پرشانت کشور نے جو اپنی آبائی ریاست بہار میں پدیاترا کررہے ہیں۔

 موتیہاری میں میڈیا نمائندوں نے پوچھاتھا کہ آیا انہیں اپنی کوشش اور راہول گاندھی کے بڑے مارچ میں کوئی مماثلت دکھائی دیتی ہے۔ اس پر پرشانت کشور جواب دیاکہ بڑے لوگ ہیں۔ میں ان کے مقابلہ میں کچھ بھی نہیں۔

راہول گاندھی 3500 کلومیٹرطویل مارچ کررہے ہیں۔ میرے لئے کلومیٹرس کی کوئی اہمیت نہیں۔ میں اکتوبر سے نان اسٹاپ(بنارُکے) چل رہا ہوں لیکن میں اسے اپنے فزیکل فٹنس کے ثبوت کے طور پر دکھانا نہیں چاہتا۔کانگریس قائد پر بظاہرطنز میں پرشانت کشور نے کہا کہ نہ تو میں نئے سال پر بریک لیتا ہوں اور نہ گھرجاکرآتا ہوں۔