مسلمانوں کو ہندوستان میں رہنے کا حق نہیں سمجھنے والا ہندو نہیں: موہن بھاگوت

امریکہ: راشٹریہ سویم سیوک سنگھ (آر ایس ایس) کے سربراہ موہن بھاگوت نے کہا ہے کہ جو شخص خود کو ہندو سمجھتا ہے لیکن یہ خیال رکھتا ہے کہ مسلمانوں کو ہندوستان میں نہیں رہنا چاہیے، وہ ہندو اقدار کی نمائندگی نہیں کرتا۔

امریکہ میں منعقدہ ’ون ورلڈ ون ہیومینٹی‘ تقریب سے خطاب کرتے ہوئے موہن بھاگوت نے مذہبی ہم آہنگی، انسانی مساوات اور ایک دوسرے کے احترام کی اہمیت پر زور دیا۔

موہن بھاگوت نے کہا، ’’اگر کوئی ہندو یہ سمجھتا ہے کہ مسلمانوں کو ہندوستان میں نہیں رہنا چاہیے تو وہ ہندو نہیں ہے۔‘‘

انہوں نے کہا کہ ہندو ہونے کے لیے یہ یقین رکھنا ضروری ہے کہ مختلف راستے ایک ہی مقصد تک پہنچتے ہیں اور ہر انسان احترام کا مستحق ہے۔

آر ایس ایس سربراہ نے مزید کہا کہ انسانوں کے درمیان کوئی فرق نہیں ہے اور ہر فرد کو مساوی عزت اور احترام ملنا چاہیے۔

موہن بھاگوت کے ان بیانات کو مختلف مذاہب کے درمیان باہمی احترام، اتحاد اور بقائے باہمی کے پیغام کے طور پر دیکھا جا رہا ہے۔