تین ماہ کا معصوم لڑکا پانی کے ٹینک میں مردہ پایا گیا

حیدرآباد: تلنگانہ کے ناگر کرنول ضلع میں ایک دل دہلا دینے والا واقعہ پیش آیا ہے جہاں ایک تین ماہ کا معصوم لڑکا پانی کے ٹینک میں مردہ پایا گیا۔ یہ المناک واقعہ گاؤں پالیم میں پیش آیا جس کے بعد علاقے میں سنسنی پھیل گئی۔

مقامی افرادکی اطلاع پر پولیس نے موقع پر پہنچ کر تحقیقات کا آغاز کر دیا۔

تفصیلات کے ایک جوڑے کے درمیان گزشتہ کئی دنوں سے جھگڑے چل رہے تھے۔ ان ہی اختلافات کی وجہ سے نیلما نامی خاتون اپنے تین ماہ کے لڑکے کو لے کر مائیکے آ گئی تھی۔

دونوں خاندانوں کے درمیان صلح اور میاں بیوی کے تنازعات کو حل کرنے کے لئے ایک پنچایت بلائی گئی تھی تاہم پنچایت میں کوئی فیصلہ نہ ہو سکا اور فریقین اپنے اپنے گھر چلے گئے۔

بتایا جاتا ہے کہ آدھی رات کے وقت لڑکا اپنی ماں کی گود سے اچانک غائب ہو گیا۔ پریشان حال ماں نے جب بچے کی تلاش شروع کی تو معصوم کی لاش پانی کے ٹینک سے برآمد ہوئی۔

لڑکے کی ماں اور اس کے خاندان والوں نے الزام لگایا ہے کہ اس موت کا ذمہ دار لڑکے کا باپ ہے۔ پولیس نے اس سلسلہ میں مقدمہ درج کرکے شک کی بنیاد پر میاں بیوی دونوں کو حراست میں لے کر پوچھ گچھ کی جا رہی ہے۔