بھدرادری کوتہ گوڑم میں سڑک حادثہ،14مسافرین زخمی

حیدرآباد: تلنگانہ کے بھدردری کوتہ گوڑم ضلع میں پیش آئے سڑک حادثہ میں 14مسافرین زخمی ہوگئے۔یہ حادثہ آج صبح کی اولین ساعتوں میں ضلع مستقر کے منگلاونم علاقہ میں اُس وقت پیش آیا جب حیدرآباد سے جانے والی تیز رفتار آر ٹی سی بس کے ڈرائیور نے اس کا توازن کھودیا۔

 جس کے نتیجہ میں یہ بس ڈیوائیڈر سے ٹکرا گئی اوراس میں سوار مسافرین میں سے 14 مسافرین زخمی ہوگئے۔اس حادثہ کی اطلاع ملتے ہی پولیس نے موقع پر پہنچ کر امدادی کارروائیاں شروع کر دیں۔

پولیس نے زخمی مسافرین کو علاج کے لئے سرکاری اسپتال منتقل کردیا اور اس سلسلہ میں ایک معاملہ درج کرکے جانچ شروع کردی۔ حادثہ کے وقت بس میں جملہ 32 مسافرین موجود تھے۔